Lyngba ka Solar Mission u CM yn kynshew ka Sorkar 100 klur shisnem

Shillong, Nailar 11 : U Myntri Rangbah ka Jylla Conrad K Sangma, Mynta ka Sngi Thohdieng, ula pyllait paidbah ïa ka Chief Minister’s Solar Mission bad pynbna ba ka Sorkar kan kynshew haduh T. 100 klur shisnem ban pyntreikam ïa kane ka Mission hapoh ka Jylla.
U Myntri Rangbah ula pyllait paidbah ïa ka CM’s Solar Mission ha ka jingïalang ba la pynlong ha State Convention Centre, Shillong, ha ka jingiadon ryngkat u Myntri ka tnad Bording Abu Taher Mondal bad u Chairman ka MNREDA Rupert Momin.
Haba kren ha ka jingïalang, u Myntri Rangbah ula ong “Ka CM’s Solar Mission kan wanrah ïa ki jingpynkylla ha ka rukom kynshew pisa ban kyrshan ïa ka mission. Da ka jingkut jingmut ban pynkhlaiñ ïa ka jingpynmih bording na kiwei ki tyllong bym pynjot mariang (green energy), ka Sorkar Jylla kan ai ïa ka subsidy kaba biang bha. Ki Unit kiba heh kin ïoh haduh 70% ka subsidy bad kiba rit kin ïoh 50% ka subsidy. Ban pynsting ïa ka jinglut jingsep, ka Mission kan ïarap ruh ban plie lynti lyngba ki Bank ban ïarap ban pynïoh haduh 40% ka bailut baisep”.
Ula pyntip ba ka Sorkar Meghalaya ka la buh ïa ka mang pisa ban kynshew haduh T. 100 klur shisnem na ka bynta ka Solar Mission. Ula pyntip ba ki nongïoh jingmyntoi kin donkam ban siew ïa ka down payment ba tang 10% ban ïoh pyntreikam ïa kane ka mission.
Haba ñiew ïa kane ka jingpyllait paidbah ïa ka CM’s Solar Mission kum ka sienjam ba shakhmat ha ka lynti ïaid jong ka Sorkar ban tehlakam ïa ka jingkyrduh bording ha Jylla, ula ong “Ka lah ban nym ratdyngkhong lut ïa baroh ki jingeh, hynrei ngi lah ban ïohi ba haduh 30-40 % ki longïing kin ïoh bording lyngba ki solar unit”.
U Myntri Rangbah ula ong ba ki jaka pule bad ki jaka treikam kiba heh kin ïoh jingmyntoi bha na kane ka skhim.
Kum shibynta jong ka skhim, ki Unit ba 40 KVA kin ïoh ïa ka subsidy ba 50%, ka ban pynduna bha ïa ka jinglut jingsep.
“Ngi sngew sarong ruh ban pynbna ïa ka jingpynkha ïa ka LED Assembling Unit ha kylleng ki jaka ka Jylla jong ngi. Kine ki jaka pynmih LED ym tang ba kin aikam aijam ïa ki samla hynrei kan pynlong ruh ïa ka Jylla ba kan shaniah halade ha kane ka bynta”. Ula ong.
Nalor kane, u ïathuh ba ka la don ruh ka jingïakren bad ki kompani shna battery ban lah pynkha ïa ka karkhana pynmih battery bad ban maramot ïa ki battery hapoh Meghalaya. U ong ba ka jingthmu jong kane hi ka long ban tehlakam ïa ki jingeh haba ïadei bad ka jingdonkam ba bujli ïa ki battery bad kiwei kiwei.
Ki mat ba kongsan jong ka CM’s Solar Mission ki kynthup :
– Subsidized Solar Hybrid Inverters bad Solar Water Heaters ïa baroh ki Nongshongshnong.
– Ka jingai ïa ki solar inverter naduh 500 VA haduh 40 kVA, ba la shna ban pyndap ïa ka jingdonkam bording jong ki Longïing longsem, ki jaka treikam bad ki dukan.
– Ban wanrah lang ïa ka solar system bad ka main grid lyngba ka net metering, ka ban pynlong ïa ki Longïing kum ki tyllong pynmih boring bad pynduna ïa ka jingsiew bai bording.
– Subsidized solar water heaters ban pynïoh ïa ka umkhluit khlem da shaniah ha ka bording elektrik bad kiwei kiwei.
Haba ai jingkren, u Myntri ka Tnad Bording AT Mondal ula kren bad ïaroh ïa u Myntri Rangbah ka Jylla halor ki sienjam ba ula shim ki ban sa ai jingmyntoi bha ïa ki paidbah ka Jylla. Ula kren ruh halor ki jingeh ba ïadei bad ka bording elektrik namar ka Jylla Meghalaya ka dang shaniah tylli ha ki hydro project ban pynmih bording elektrik.
Kiwei pat kiba la kren ha ka jingïalang ki kynthup ïa u Chairman ka MNREDA Rupert Momin bad u Secretary ka Tnad Bording Joram Beda.