Tang arsien ha ka shisnem lah ban leit bar-ri u Myntri Rangbah, ki Myntri bad ki Ophisar

Shillong, Nailar 11 : Ka Kynhun Myntri jongka Sorkar Jylla kaba la ïa kynduh mynta ka Sngi Thohdieng, ka la rai ban pynshong nongrim bad bishar bniah bha bad ban buh da u pud ïa ka jingleit bar-ri jong u Myntri Rangbah ka Jylla, ki Myntri Sorkar bad ki Ophisar ka ban long noh tang arsien ha ka shisnem jong u ka snem mang tyngka.
Ka Sorkar ka la shim ïa kane ka rai ha ka jingïalang jong ka Kynhun Myntri kaba la pynïaid da u Myntri Rangbah ka Jylla Conrad K Sangma.
Haba ïakren bad ki nongthoh khubor, u Myntri Sorkar bad Nongaiktien ka Sorkar MDA u Bah Paul Lyngdoh ula ong, hooid, katto katne na kine ki jingleit bar-ri ki dei halor ka jingshah khot sngewbha sha ki jingïalang, ki jingleit delegation bad kumta ter ter ha ki prokram bapher bapher kum ki project ba bei tyngka na shabar ri, ka capacity building programme bad kiwei kiwei.
“Hynrei haba buh hakhmat ïa ka pla tyngka ka Jylla bad ruh halor ka jingdonkam ban pynshong nongrim bha ïa kine ki jingleit, la shim ïa ka rai ba nangne shakhmat, ka jingleit bar-ri jong ki Heh ka Sorkar Jylla kynthup ki Nongtrei contract kan long noh tang arsien ha kawei ka snem mang tyngka” ula ong.
“La rai ruh ba lada ujuh u Ophisar u hap ban leit jingleit arsien, u dei ban aiti shuwa ia ka progress report (kaiphod) jong ka jingleit ba nyngkong bad da ka jinglah jong u ban aiti ïa ka kaiphod kaba pynhun bad kaba pyni ïa u soh, yn sa lah ban ai jingbit ba un leit biang sa shisien” ong u Bah Paul haba bynrap ba la shim rai ruh ba ka Sorkar ka lah ban bei pisa tang kawei ka jingleit bad ïa ka sien kaba ar yn hap ban bei da ka Sorkar India lane kino kino ki Agency ba nabar Ri.
“Kaba la pyllait noh ka long satang lada kine ki Heh Sorkar ki leit sha ki bar-ri ban pdiang ïa ki khusnam na ka bynta ka Sorkar Meghalaya” ula bynrap.
Haba kylli, u Bah Paul ula ong “Ka mat hi ka long ba ka don ka jingkyrpad na baroh bad ki jingleit donkam shabar jong ki Ophisar bapher bapher ïa kaba hap ban ïoh jingbit na u Myntri Rangbah ka Jylla. Hynrei mynta ka Sorkar ka la rai ban da pynshong nongrim bha ïa kum kine ki jingleit, pynduna ïa ka jingleit shabar-ri tang arsien bad ruh ban aiti ïa ki kaiphod khnang ba kan ym don shuh ka jingpynsyrwa kai ïa ka pisa u paidbah”.
“Haba ïadei pat bad ki Myntri Sorkar, kumba phi tip ba kane ka shong ruh ha ka jingai jingbit jong ka Ministry of External Affairs (MEA) bad dang shen, ka MEA ka la wanrah ïa ka kyndon ba pyrkhing bha wat ban ai jingbit ïa kum kine ki jingtyrwa leit jingleit shabar ri. Kane ka kynthup wat ïa u Myntri Rangbah ka Jylla. Kane kan hap lang hapoh kane ka rai kaba mut uwei u Heh Sorkar kawei ka jingleit sha bar-ri ka ban shong kat kum ka kaiphod ba un ai” ula ong.
Halor ka jingkylli, u Bah Paul ula ong ba ki don ki khep ba ki Heh Sorkar ki la leit sha bar-ri bad ki la aiti ïa ki kaiphod bad don ruh ki bym ai kaiphod lane ki kaiphod kim ai jinghun satia.
“..namar ngi la ïaid mynta ha ka lynti ba donkam ban ïoh kheit ïa u soh bad kaei kaba ngi ong mynta ka dei ka rai ka Sorkar, ba ki Myntri kin hap pyni ïa u soh haba ki leit jingleit sha bar-ri” ula ong.