Bteng ka High Court ban tuklar kam khaïi dewïong be-aiñ, lap sabut ba donkti ki heh Sorkar

By Mawphor News Desk On Aug 12, 2023

FILE PHOTO: Labourers work at a coal stockyard in East Jaintia Hills in Meghalaya, India, September 16, 2015. . REUTERS/Krishna N. Das

Shillong, Nailar, 11: Ka High Court of Meghalaya ka la ïai bteng ban tuklar ïa ka kam khaïi dewïong beaiñ ha ka jylla, namar ba ka la ïoh jingtp ba kane kam beaiñ ka dang bteng haduh mynta.
Ka Bench ne ka jingbishar kaba kynthup ïa u Chief Justice Sanjib Banerjee, u Justice W. Diengdoh bad u Justice HS Thangkhiew, ka la ïoh jingtip na ki nongujor ba kane ka jingïi beaiñ ka dang bteng sah haduh mynta.
Ha ka jingshim bishar hynnin ka sngi, ka ïingbishar ka la ong ruh ba la lap ki sabut ne kata ka prima facie evidence ba ki don katto katne ki ophisar sorkar kiba ïadonkti lang bad ki nongkhaïi dewïong beaiñ da ki briew kiba na shabar jylla.
Kawei patka jingpynpaw ka ïingbishar ka long ba ki briew kiba donkti ha kane ka kam khaïi ne kiba dei peit kiba hakmat eh ne kita ki kingpin haduh mynta ki dang ïaid sahuh khlem pyrwa eiei ruh em namar ba ki Pulit kim pat kem satia ïa ki.
Hynrei na ka liang u nongïasaid na ka liang ka sorkar, uba don ha ïingbishar, u la ong ba na ka liang ki Pulit ki la trei shitom ban thwet ïa ki briew kiba donkti ha kane ka jingïakhaïi beaiñ, hynrei namar ba ki nongkhaïi kiba kham hakhmat kidei kiba na shabar jylla, ka kham shitom ïa ki ba kin ïoh kem namar ba ki la phetrieh. Hynrei wat la katta ruh ki bor Pulit ki la trei shitom wat ban leit thwet shabar jong ka jylla ruh.
Ha kajuh ka por, ka ïingbishar ka la pynpaw ruh ba wat lada ki la don ki kompeni kiba la ujor halor ka jingphah pynkhyllem ki DC ïa ki Coke Factory ba la tei beaiñ, hynrei na ka liang ka ïingbishar kam shym la treh ban tuklar bad ka hukum ba la pynmih da ki Deputy Commissioner.
Ha kaba ïadei bad ka jingpynsangeh ka Supreme Court ïa ka jingphah pynkhyllem ki DC ïa ki atoskhana jong ki Coke Factory, ka ïingbishar jong ka Meghalaya, ka la ong ba kane pat kam mut ba ki DC kim lah pat ban khang khyrdep ïa ki karkhana kiba la shu mih bad treikam beaiñ.
Ha kane ka hukum, ka ïingbishar ka la ong ba kam shym la pynmih kano kano ka hukum ban phah pahara noh da ki Central Arm Police Force ha kaba ïadei bad ka jingtalasi ïa ka jingkhaïi dewïong beaiñ, hynrei kadei tang ka jingai jingmut bad ka jingtyrwa.