Shillong, Nailar, 11: Ka Kynhun Myntri jong ka Sorkar Jylla ha ka sngi Thohdieng ka la mynjur ïa ka Mid-career Sponsored Courses na ka bynta ki ophisar Sorkar khnang ban pynjanai ïa ka kam shakri ha ka jylla.
“Ka Kynhun Myntri ka la wanrah ïa ka jingïathir ïatai halor ka mid-career sponsored courses na ka bynta ki ophisar heh kyrdan kiba dei na ka All India Services (AIS), Meghalaya Civil Service (MCS), Meghalaya Police Service (MPS), Forest bd Finance Services khnang ba kin nang lah shuh shuh ban pynjanai ïa ka jingshakri jong ki ha ka jylla, kaba long ruh kawei na ki jingïadei ba kongsan hapdeng ka synshar ka khadar bad ki paidbah,” ong u Myntri ka Sorkar Jylla Bah Paul Lyngdoh uba long ruh u Nongaiktien jong ka Sorkar ha ka jingïakren bad ki lad pathai khubor hadien ba la wai ka jingïalang.
U la ïathuh ha ka jingïathir ïatai, ka Sorkar ka la shim ïa ka rai ban pynshlur ïa ki Ophisar ba kin bteng ïa ka jingpule ha ki skulbah bapher bapher, kiba ai ïa ki Degree bad ki Diploma. Ki ophisar kiba kwah ban bteng ïa ka jingpule kin ym ïoh ban shim shuti.
“Kan ym don kano kano ka jingai shuki, hynrei kin bteng ïa ka jingpule ynda la wai trei bad ha ki sngi shuti kut taiew,” u la ong.
U Bah Paul u la ïathuh ba ki Courses ba la tyrwa ki kynthup ïa ka MBA ba la tyrwa da ka IIM Shillong, ka Masters in Public Policies kaba dei ka online course ba la tyrwa da ka OP Jindal Global University, ka Professional Certificates Programmes bad Data Sciences bad AI, kaba dei ka online course ba la tyrwa da ka Indian Institute of Information Technology, Bangalore lane da ka University of Merriland, ka Ph.D Programme for working professionals ba la tyrwa da ka IIM Shillong bad ka Part Time Ph.D for working professionals ba la tyrwa da ka Jindal Global Law Schools bad ki IITs, ka Executive fellow in management lane ka Ph.D in management programmes ba la tyrwa da ki IIM.
Na ka bynta kine ki Ophisar, u Bah Paul u la ïathuh ba ka Sorkar ka la mynjur ïa ka jingtyrwa ban bei pisa na ka bynta ka jingpule kaba kot haduh 15 lak da kaba buh ruh ïa ki katto katne ki kyndon.
“Kum ka nuksa, ki ophisar ki dei ban long kiba dang sah sa 7 snem ha ka kam, ki lah ban bteng ïa ka jingpule Part Time Basis khlem da shim shuti bad manla u snem haduh lai ngut ki ophisar kiba ïoh pule lyngba ka jingmynjur jong ka Sorkar yn bei jingkyrshan pisa da ka Sorkar.
Yn sa thaw ruh ïa ka Committee ban khlieh da u Chief Secretary ban bishar bad ban mynjur ïa ki aplikeshon na ka bynta ki ophisar kiba kwah ban pule pyntbit shuh shuh ïalade.
Ha kajuh ka por, ka Kynhun Myntri ka la mynjur ruh ïa ka Draft jong ka jingkren ha ka sngi rakhe laitluid ka ri kaba kdew ïa ki jingjop jong ka Sorkar ha kiba bun ki liang naduh ba la shimti ïa ka bor synshar ha ka jylla.
