Lum jingïalang ka ‘Volunteer for A better Jaiñtia’ ban dawa pynïoh Ration Card sha ki longïing ba dei hok

By Mawphor News Desk On Mar 13, 2023

Jowai, Lber 12: Kawei na ki seng treimon sngewbha ka ‘Volunteer for A better Jaiñtia’ kaba trei na ka bynta ka miat ka bha jong ki khun ka Ri-Jaiñtia ha kane ka sngi Saitjaiñ 11 tarik kala pynlong ïa ka jingïalang ha Dorbar Hall ka Tpep-pale Jowai, ha kaba la wan ban ïadonlang naduh ki longkmie ki longkpa kiba im ja na ka kam bylla sngi hapoh ka West Jaiñtia Hills.
Ïa ka jingïalang la pynïaid da u Phrangsngi Sutnga, Convener Volunteer for better A Jaiñtia uba la pynsngew halor ka thong bad ka jingthmu jong kane ka jingïalang, katba ka kong Dayoophi Iakai, Convener Volunteer for A better Jaiñtia kala pynsngew shaphang ki kam ba mih hadien ka jingïakren bad ki heh ka Food and Supply, West Jaiñtia Hills.
Ka kong Daioophi Iakai kala ïathuh na ka liang ka ophis treikam jong ka Food and Supply, West Jaiñtia Hills kala dep ban phah lut ïa baroh ki Application na ka bynta kiti kiba ïaleh thymmai ïa ki Ration Card jong ki sha Shillong, kala ong ruh ban ïoh ïa ka Ration Card ba thymmai kum ki nongshong shnong kin hap ban pynthymmai ïa ka Cencus.
Halor kane ka jingïoh jingtip na ka liang kiba bun na ki longkmie kila pynpaw ka jingsngewnguh ïa ka sorkar kaba la ïarap ban pynioh ïa kane ka hok jong ki kum ki nongshong shnong ka Ri India kata ban ïoh ei ïa u khaw ration kaba long katkum ka jingmang jong ka sorkar kmie.
Katba na ka liang u ma Khroo Lamsalanki Pariat ha ka jingkren ula batai shaphang ki rukom ïoh jingmyntoi jong ki nongshong shnong ka Ri na ki lai tylli ki Ration Card kiba long katkum ka jingmang ïa ka bhah na ka Sorkar Delhi kiba kynthup ïa ka AAY Card, PHH Card wa ka Non NFSA card.
Na ka bynta ka jingmyntoi jong ki khun ka Ri-Lum Jaiñtia kiba dei hok ban ïoh ïa kane ka bhah khamtam kito ki longïing ba duk ba rangli, kiba im sngi na ka kam bylla sngi, u ma Pariat ula pynpaw ba ka por kala dawa ïa baroh ki longïing ba duk ba kin ïeng tylli lang kawei ka sur ban dawa ïa ka hok jong ki na ki bor ba halor da ka jingïatrei lang bad ki nongsam Rashon bad ki Waheh Chnong.
Ha kane ka sngi la ïa kren ruh na ka bynta kito ki longkmie bad ki longïing ki bym pat ïoh ïa ka Ration Card hadien ba kila dep Apply da ki bun snem, ha kane ka jingïalang kaba mih ruh ka rai ba kin thoh sha ka Sorkar jylla kumjuh sha ka Sorkar India ban pynjhan ïa ka jingleh Census khnang ba baroh ki longïing kin ïoh ïa ka hok jong ki.
La ïakut ruh ban leit kynduh ïa ki briew jong ka aiñ na ka bynta ban dawa sha ka ïing bishar ba don burom ka Meghalaya High Court lada ka kam ka dawa bad ban pynbor ïa ka Sorkar la kumno kumno ban pynïoh Ration Card sha ki briew kiba dei hok hapoh jong u bnai March 2024. Ha ka juh ka por yn dawa na ka sorkar ban pynïoh Ration Card sha waroh kito kiba la dep apply bad kiba la dep ban leit buh ïa ki kot donkam sha ka ophis treikam jong ka Food and Supply naduh u snem 2020-2021.