Da ka dukan jaiñ ryndia plie u ophisar barim ka tnad textile ban pynïaid ïew ïa ki jaiñ ryndia na Ri Bhoi

Nongpoh, Lber 10 : Da ka jingangnud ban pynïaid ïew bad pynpaw pyrthei ïaki jaiñ Ryndia kiba pynmih na Ri Bhoi District khamtam naka thaiñ Plasha, Umden, Diwon, Umkon bad Mawlong, bad kiwei kiwei de ki shnong, u Bah I.A Diengdoh uba dei u ophisar bala shongthaid ka tnad Textile, mynta ka sngi u la lah ban plie paidbah syndon ïa kawei ka dukan ba die ïaki jaiñ Ryndia, ki tiar shna kti, bad ki jaiñ bala oh shrong bad pynwandur da ki jaiñ Ryndia haki rukom bapher bapher kaba don ha rud surok bah National Highway haka shnong Mawdiangum.
Ïa katei ka dukan la wan ban plie paidbah da u Bah Mayral Born Syiem MLA ka Nongpoh kum u kongsan haka jingdonlang u Bah FR Kharkongor Commissioner and Secretary ka sorkar Meghalaya, ka Kong RB Lyngwa District Sericulture Officer, ki bahaiing hasem bad kiwei kiwei ki riew rangbah.
Naka liang u Bah I A Diengdoh u la aiti ruh ïa katei ka dukan haka samla Baphinbha Rynjah kaba dei ka khun jong u kaba dei ruh ka Fashion Designer kaba pyndep ïaka Graduate na National Institute of Fashion Technology.
Haba kren sha ki lad pathai khubor naka liang u Bah IA Diengdoh u ba long trai ïa katei ka dukan u la ong baka jingthmu jong u ban plie ïa katei ka dukan ka long ban pynïaid ïew ïaki jaiñ ryndia kiba pynmih na Ri-Bhoi kumba bun naki nongthaiñ jaiñ ki ud bad ïam ruh namar ka jingbym biang jong ka ïew ka hat bad kaba sngewsih ka long ruh ba kala don ka jingkam trai wat na kiwei ki jylla ïaki jaiñ bala thaiñ da ki nongthaiñ jaiñ ka Ri-Bhoi.
Kum u ophisar bala shongthaid bala bat ruh ïaka kyrdan Director haka tnad Textile, u iohi ïaki jingeh jong ki nongthaiñ jaiñ bad lyngba katei ka dukan lehse kan ïarap shibun ha kaba ïadei bad ka jingpynïaid ïew ïaki jaiñ Ryndia bad khamtam u don ruh ka jingangnud wat ban die haki ïew Online lyngba ki kor Internet ha kane ka juk stad ba mynta.
U Bah Mayral Born Syiem haba kren ha katei ka sngi u la pynpaw ka jingsngew kmen kaba khraw ba kum kitei ki jait dukan ki mih ban pynthikna ba ki nongthaiñ jaiñ Ryndia na Ri-Bhoi ki dei kiba tbit ban plie ïaka lad ka lynti naka bynta ki nongthaiñ, bad lyngba katei ka dukan bala don ruh kiba lah ban oh shnrong lane pynwandur katkum ka jingkwah jong ki paidbah, haki dur ki sopti, ki jaiñ sem bad kiwei kiwei.
U la ong ruh ba ka long ka jingsarong kaba khraw baka Raid Nongtluh la tip kum ka Eri Silk Village bala buh ruh ïaka Umden-Diwon kum ka headquarter bad kum u nongmihkhmat ryngkat ka jingtreilang bad ki ophisar un sa shimkhia shuh shuh ban wanrah ki lad jingïarap naka bynta ki nongthaiñ la ki dei ki riew shimet, ne ki kynhun ban kyntiew ïaka kam thaiñ jaiñ.