Kumba la leh ha ki snem ba la leit, ngan bteng ban tan ïa ki kam pynroi ha Jirang Constituency : Sosthenes
U Bah Sosthenes Sohtun u la pynpaw ba ha ka jinglong nongmihkhmat jong u, u la pyrshang ban wanrah shibun ki kam pynroi haka thaiñ Jirang, naduh ki surok, ka pule ka puthi, ka koit ka khiah, bad khamtam ka Civil Sub Division
Nongpoh, Lber 12: Hadien ba ki paidbah ka Jirang Constiteuncy kila pynjop biang sa shisien ïa u Bah Sosthenes Sohtun kum u nongmihkhmat sha ka ïing Dorbar thawaiñ ka jylla, u la kular kumba la leh haki snem bala leit noh naduh u 2018 haduh 2023, ban bteng ban tan ïaki kam pynroi ha katei ka constituency naka bynta ka jingbit jingbiang bad ka jingmyntoi jong ki paidbah khamtam ki jingangnud kiba dang sahteng.
Haba kren sha ki lad pathai khubor mynta ka sngi ha ïing sah jong u Bah Sosthenes Sohtun ha Byrnihat u la pynpaw ka jingkhublei bad sngewnguh ïa u Blei nongbuh nongthaw u ba la ri la sumar ïa u bad kumjuh ruh ïaki paidbah nongkyrshan ka party NPP kiba la trei shitom bad sa shisien kila buh ka jingshañiah ban ailad biang naka bynta ban mihkhmat ïaka Jirang Constituency, bad ka jingkhublei ba kyrpang wat sha kito ki bym shym la kyrshan ban ïatreilang naka bynta ki kam pynroi.
Naka liang u Bah Sosthenes Sohtun u la pynpaw ba haka jinglong nongmihkhmat jong u, u la pyrshang ban wanrah shibun ki kam pynroi haka thaiñ Jirang, naduh ki surok, ka pule ka puthi, ka koit ka khiah, bad khamtam ka jingwanrah ïaka Civil Sub Division bad ha kane ka kynti ba mynta kum u MLA ba ki paidbah kila shañiah u la kren shai ba un bteng ban leh kumjuh ban tan ïaki kam pynroi ha Jirang Constituency ryngkat ka jingngeit skhem ba ki lad ki lynti kin plie kumba ngi kyrmen ban bteng ïaki kam ki jam lyngba ka jingïarap jong ka sorkar ba ngi lah pat ban saiñdur ïaka constituency hi baroh kawei.