Nongstoiñ, Lber 12: Ka jingleh meng jong uwei u trai jong kawei ka karkhana thang dewïong kaba don ha Shallang u ba la tip kyrteng kum u Dharmu, u ba dei ruh u bar jylla hynrei u la pynkylla sha ka jait Sohbar kaba dei ka jait Khasi, ka la pynbitar lep ïa ki nongïalam jong ka All Meghalaya Truck Owner & Driver Association bad ha ka sngi thohdieng ka 10 tarik Lber, ki nongïalam jong ka Association ryngkat ki nongñiah trok ki la hiar sha Shallang ban khang tala shisyndon ïa katei ka karkhana thang dewïong jong utei u bar jylla.
Hadien ba ki la dep ban khang tala ki la wanphai bad leit sha ka ophis jong u Dharmu ban ïakren, hynrei kim lap shuh namar ba mar ïatip ba ki nongïalam ka Association ki la hiar sha ka karkhana, u la sheptieng bad u la phet krad noh sha Guwahati. Haba ki nongïalam ka Association bad ki nongñiah trok ki la poi ki la lap satang ïa ki manager ha katei ka ophis jong u.
Ha ka jingïakren kaba la neh slem bha ka la poi sha ka jingïania kaba jur bad ka la jan poi wat haduh u pud jong ka jingïasyndong kti ha kaba kitei ki manager kiba dei ki bar jylla ki la hap ban pyndem.
U bah Mosklandar Marngar President ka AMCTODA haba ïakren ha katei ka sngi, u la ong ba ha u bnai Kyllalyngkot ba la dep ki nongïalam ka Association ryngkat ki nongñiah trok, ki la leit ban ïa kynduh ïa u Dharmu bad ki la dep ïapynbeit ba ïa ka bai kit ïa u dewïong ba la dep saiñ, dei ban ai ha ka dor ar hajar phra spah tyngka shi metric ton na Shallang haduh Byrnihat. Katba lada leit pynhap sha ki jaka ba kham jngai na Byrnihat kum ha Jagiroad bad kiwei kiwei ki jaka, dei ban ai ha ka dor lai hajar haduh lai hajar ar spah shi metric ton bad utei u Dharmu ruh u la kular ban leh kumta.
U la ong ruh ba kaba lyngngoh ka long ba hadien katto kane sngi, u la kylla jutang bad u la leh katba u mon bad um shym la bat ïa ka kular ba la ïakut. Kumta hadien ba ki nongñiah trok ki la ud bad ujor ïa ka jingshah khñiot ïa ka bai kit bad ka jingleh meng jong utei u Dharmu, ki nongïalam ka Association kim banse ban leh da ka kam da kaba leit khang tala shisyndon ïa katei ka karkhana thang dewïong jong u.
Nalor kata uwei u nongñiah trok u la ïathuh ba ka jingleh baheh jong utei u bar jylla, ka la pynbitar ïa baroh ki nongñiah trok, namar haba leit pan ïa ka bai kit teng teng u ai shi hajar tyngka shi metric ton teng teng u ar ar hajar tyngka bad don teng teng ba um ai wat shi tyngka ruh hynrei u beh ïa ki na ka ophis jong u.Katei ka jingleh jong u Dharmu ka la pynbitar ïa ki.
Ha katei ka sngi ba ki nongïalam ka Association ki la leit ban khang tala ïa katei ka karkhana thang dewïong, la lap ruh ba ki don bun bah ki nongtrei kiba la wan ïalam ïa ki lok bad ki khun ki kti jong ki bad kaba isangsot ka long ba ki khunlung bad ki khynnah rit ki thiah ha madan bad ring mynsiem da ka tdem kaba mih na ka jingthang dewïong. Nalor kata hapdeng jong ka jingtap ka pum pum kaba la I sangsot shisha ban peit.
Ha kaba ïadei bad ka jingdon jong ki khunlung bad ki khynnah rit ha katei ka karkhana thang dewïong, na ka liang ka Association ka dawa ïa ka sorkar ba kan shimkhia ban leh ei ei, namar katei ka jingleh jong u Dharmu u trai jong ka karkhana thang dew, ka la pynkheiñ im im peit peit ïa ka hok jong ki khynnah rit bad ki khunlung.
