Long kiba trei shitom wat hapdeng ki jingeh ba phi ïakynduh ha ki jingpule: DP Wahlang

Mawkyrwat, ‘Nailur 01: Kum ka dak jong ka jingai mynsiem jingpyn-shlur ïa ki samla pule ba kin nang kiew ha ki kyrdan jong ka jingpule ka Sngap Syiem College, Mawkyrwat mynta ka sngi ka la pynlong ïa ka jingpynkup burom ne ka Graduation Day Ceremony kaba long shibynta jong ka Youth Festival 2023 ba ar sngi ha kaba u bah D.P. Wahlang, IAS, Chief Secretary jong ka jylla Meghalaya u la long kum u kongsan.
Kane ka jingrakhe ka dei ha ka phang, “Kmen katba phi dang im, teh lakam, pynduh ïa ka HIV/AIDS” ha kaba ha kane ki don ruh ki Skit (Red Show), Cultural & Variety Show, Red Run, Red Ribbon (Quiz Competition) ki long shibynta na ki jingïalehkai jong katei ka Youth Festival.
U bah D.P. Wahlang, IAS, Chief Secretary jong ka jylla Meghalaya haba kren kum u kongsan u la ong ba kane ka dei ka sngi kaba kmen ka ban pynkynmaw ïa ki jingtreishitom wat hapdeng ki jingeh kiba ki ïa kynduh hapdeng ka jingpule. U la ai mynsiem ïa ki ban nang trei shitom bad ban wad lad shuh namar kane ka long ka jingjop ka ban plie lad lynti ban peit kaei kaba ki dei ban leh nangne shakhmat. U la ong ba ka jingjop kam dei kaba kut lymne ka jingrem kam dei ka jingïap hynrei ka dei ka jingshlur ban bteng shakhmat bad ban peit jngai khnang ban nang kiew shuh shuh. Namarkata, u la pynshlur ïa ki ban nang jam shakhmat bad ban mad ïa ki jingeh khnang ban ïoh ïa u soh ka jingjop.
Haba kren pat ha kaba ïa dei bad ka Youth Festival, u bah D.P. Wahlang u la ong ba ki Festival ne ki jinglehkmen ki dei ki bynta kiba kongsan kiba kum ki khynnah ki dei ban ïa shim bad ïa don bynta namar ka long ka lad ha kaba ki lah ban pyni ne pynpaw ia ki sap ki phong kaba ki don. Namarkata, u la kyntu ïa ki ban ïa don bynta ne ïashimbynta ha kiba kum kitei ki jingïalehkai na ka bynta ka jingmyntoi jong ki hi. Ha kajuh ka por u la hikai ïa ki khynnah ban ym leh lut phew hynrei ban nang ban kynshew ban kyndiap, ban don ka jingshaniah ha lade, ban khlaiñ ka jingmut jingpyrkhat ryngkat ka jingmut kaba skhem khnang ba kin lah ban poi sha ka thong kaba ki thmu bad ban jop ha baroh ki liang.
Haba kren ha kane ka jingïalang u bah T. Lyngwa, IAS, Deputy Commissioner, South West Khasi Hills District u la ïaroh ïa ki khynnah kiba la minot bad trei shitom ban poi sha ka thong ka jingjop bad ha kajuh ka por u la ïaroh ïa kane ka kolej kaba la lah ban leh bha ha ki jingpule bad ha kajuh ka por ka la pynmih shibun ki khynnah kiba don ia ki sap ki phong bapher bapher kiba ia ryngkat bad ki khynnah kiba ha kiwei kiwei ki jylla. U ngeit bad kyrmen ba kane ka College kan nang ïaid shakhmat bad ban nang kiew i-rat ha kiba bun ki liang.
Katba ka kong Patricia Mukhim ka Editor jong ka kot khubor u Shillong Times ka la ai khublei ïa baroh kito kiba la lah ban pyndep ïa ka graduation bad ha ka juh ka por ka la ai mynsiem ïa kito ki bym shym la lah ban pyndep na kiba bun ki daw. Ka la ai jingmut ban pyndonkam hok ïa ka jingnang jingstad kaba ki ïoh da kaba pynshlur ïa ki ban nang trei shitom ban kiew ha baroh ki liang bad ban ïa don bynta ha ki kam hima sima bad ban long ka lawei ba phyrnai jong ka ri bad ka jaidbynriew.
Hadien ka jingïalang ha Sngap Syiem College, Mawkyrwat, u la leit jngoh ruh ïa ka Civil Hospital, Mawkyrwat bad ïa kynduh bad ki doctor bad ki staff jong katei ka jaka sumar bad u la leit jngoh ia ki jaka pyntreikam jong ka Swaacch Bharat Abhiyaan SBM(G).
U Dr. K.K. Nongsiej, Principal jong ka Sngap Syiem College u la ai ki ktien pdiang sngewbha katba ka kong (Dr) B. Marweiñ, Vice Principal jong ka Sngap Syiem College, Mawkyrwat ka la ai ïa ki kyntien khublei.