Nongpoh, Nailur, 01: Da ka jingbuddien ki bor pulit ka Ri Bhoi halor ki kam shalan beaiñ ïa u Drok sha ka jylla Meghalaya lyngba ka surokbah National Highway-6, Ri Bhoi, ka tnad Pulit Ri Bhoi ha ka sngi Thohdieng ka la ïoh ban kurup ïa u drok na uwei u briew ha Khyndong Umling hadien ka jingtalasi jong ki Pulit ïa kawei ka Kali kaba dang wan na Guwahati ban leit sha nongbah Shillong.
Katkum ka jingïoh lum jingtip, la ong ba ki Pulit ka Nongpoh Police Station hadien ba ki la ïoh jingtip kaba bniah na ki tnat syntiat ba don ka kali ba wanrah tuh ïa u drok mar mar ki la pynap shrip ha Khyndong Umling bad ha ka jingtalasi ki la ïoh kurup lai synduk rit u drok na ka kali ka bym pat don number satia.
Ïa une u nongniah kali la tip kyrteng kum u Nurul Huda na Assam.
La ïathuh ruh ba ka jingkhia jong u drok Heroin u don kumba 29.2 Gram.
Hadien ba la ïoh kurup ïa u drok, ki Pulit ki la kem noh ïa u Huda bad kurup noh ïa ka Kali bad ka jingtohkit ka la ïaid shakhmat. Ki Pulit ki la pyngngat ïa u dribar ba donkti ban khaïi drok ha ki kyndon aiñ jong ka NDPS Act.
