Leit thep kyrteng ki 5 ngut ki kyrtong ki ban sa ïa khun na ka Mawkyrwat bad Ranikor Constituency

0

Mawkyrwat, Rymphang 06: Sa ki 5 ngut ki kyrtong ki ban sa mih madan ban ïa khun ha kane ka MLA Election jong u snem 2023 kiba dei na ki ar tylli ki konstitwensi mynta ka sngi ki la ïoh ban pyndep ïa ka jingthep kyrteng ha ki Returning Officer, South West Khasi Hills District.
Ki 5 ngut ki kyrtong ki kynthup, na ka 36 – Mawkyrwat Constituency ki don 4 ngut kata u bah Banpynskhemlang Wahlang u kyrtong shimet, u bah Renikton Lyngdoh Tongkhar na ka United Democratic Party (UDP), u bah Sounder Strong Cajee na ka Trinamool Congress Party (TMC) bad ka kong Bity Jyrwa na ka Bharat Janata Party (BJP).
Katba na ka 35 – Ranikor Constituency don tang uwei kata u Martin M. Danggo na ka Bharat Janata Party (BJP).
Haba kren ha ki lad pathai khubor, na ka liang ki kyrtong ki la pyni bad pynsngew ïa la ki jong ki jong ki jingthmu haba ki thmu ban ïaleh ïa kane ka MLA Election jong u snem 2023 da kaba ki la ïathuh ba ki don ban wanrah ïa ka roi ka par hapoh jong ka dong ka thaiñ, naduh ki lynti ki synkien ïa kaba ki paidbah ki la angnud naduh mynshwa, ki jaka sumar kiba biang, ka rep ka riang kaba paka, ki jaka pule kiba biang, ka ïoh kam ka ïoh jam jong ki samla lyngba ka jingthmu ban wanrah ïa ki shlem ai jinghikai kiba biang.
Ki la pynpaw ruh ba ha kane jingïakhun hi ym lah ban ong la ki poi ne em ha ka thong, pynban ka shong ha ka jingstad jong ki nongjied ban ai ïa kata namar ka jingïaleh hi ym lah ban ong bad don pat ki kyrtong kiba ong ba ngi la dep ban pynkhreh bha naduh ba sdang kumta ki kyrmen ban jop beit ha kane ka jingïakhun, don pat kiba ong ba ka party jong ki kan sa lah ban thaw ruh ïa ka sorkar ha kane ka elekshon ba mynta da kaba jop kham bun ki kyrtong.

Leave A Reply

Your email address will not be published.