Pynkup burom ka SSHL ïa ki samla pule kiba wan shakhmat ha ki jingïaleh eksam

0

Mawkyrwat, Rymphang 06: Ka Seng Samla jong ka Hima Langrin ha ka 4 tarik u bnai Rymphang, 2023 kum shibynta ban ai mynsiem ïa ki samla ba lah leh bha bad ïoh ïa ki percentage kiba kham hakhmat eh ha ki jingïaleh eksam bapher bapher bad ruh kum ka jingpynktik bad pynrung ïa ka mynsiem jong ka jingïakhun ha kiwei pat ki bynta, ka la ïoh ban pynkup burom ïa ki 15 ngut da kaba ai ki khusnam ne momentous, ki jaiñ kordor, ka riam tynrai khasi bad ka pisa kum ka jingkyrshan lem ia ki.
Kane ka jingleh burom, watla ka long kaba khyndiat ruh hynrei ka long pat kum ka dak jong ka jingaimynsiem ba kin nym kynran hynrei ki dei ban ïa khun beit lada ki ïa kynduh ïa ki jingeh, namar lada ki trei shitom ryngkat ka jingkut jingmut kin poi beit sha ka thong.
U President jong ka Seng Samla jong ka Hima Langrin, u bah P.S. Lyngdoh haba kren ha ka jingïalang u la ai ki ktien ai mynsiem ryngkat ki jingkyntu ba ki kum ki samla pule kin nang ïai trei shitom bad leh bha shuh shuh bad kim dei ban hun noh tang ïa kaei ba ki la ïoh mynta.
Ha kajuh ka por u la pynpaw ruh ïa ka jingsngewsarong ïa ka dong ka thaiñ baroh kawei ba na ka Hima Langrin mynta ki sei ïa kawei ba wan ha ka kyrdan kaba saw ne 4th Position hapoh ka skul bah NEHU ha ka subjek Mathematic bad ka la ïoh 81% ka samla Balasiewdor Nonglang bad kane ka long shisha ka khubor ba sngewtynnad bad sngewsarong ba ki samla na ka dong ka thaiñ ki la paw shakhmat ha ki skul bah hapoh ka jylla bad ka ri India.
Shuh shuh u la kyntu ïa ki samla ka dong ka thaiñ ba kin long ïai long kiba trei shitom kham bha namar ban poi sha ka thong donkam ïa ka “jingkut jingmut, ka jinglen lade bad ka jingtrei shitom ba ngin ïoh ban kheit ïa uta u soh ba thiang ha jingim jong ngi khamtam ha lynti ïaid jong ngi kum ki samla pule”, u la ong.
U Pa’iem khynnah ha ka jingkren jong u, u lah kyntu ba ki khun samla ki dei ban long kiba trei shitom minot namar ym don da kawei pat ka spah ba kham khraw ban ïa ka jingnang jingstad. “Ka spah ka bym ju rngad ne yn ym don ba lah ban tuh noh lane ban lute noh ïa ka spah jong ka jingnang jingstad kaba phi ïoh lyngba ka jingtrei shitom bad minot”, ong u Pa’iem khynnah ka Hima Langrin Onanstar Syiemïong.
Ha kane ka sngi pynkup burom la sakhi lang da ki kmie ki kpa jong ki khynnah ba wan shakhmat ha ki kyrdan pule ba pher bapher.

Leave A Reply

Your email address will not be published.