Leit sngewlem ka NPYF Nongpoh Block ïaka ïing ka samla Walinda Binong

0

Nongpoh, Jymmang 06 : Ki nongïalam jong ka National Peoples Youth Front, Nongpoh Block mynta ka sngi haka jingïalam u Bah Linus Lyngdoh President bad u Drumlin Lymphuid Working President kila leit ban sngewlem ïaka ïing ka sem jong ka samla Walinda Binong kaba dei ka samla pule Fashion Design jong ka Mody University kaba la khlad noh haka 27 tarik Ïaiong ha Rajasthan.
Naka liang ki nongïalam ka NPYF kila pynpaw ruh ka jingsngewsih halor katei ka jingjia kaba ym lah ban pdiang da ka ïing ka sem, halor ka jingduh noh ïala ka jong ka khun ba ïeid thep mynsiem katba ka dang leit wad jingstad jngai nala ïing, ha kaba kum ka kynhun NPYF kala buh ruh da ka jingduwai ba u Blei un pyntngen ïaka iing ka sem bad kum ka dak ka jingsngewlem naka liang ka NPYF Nongpoh Block kala noh jingïarap ruh sha katei ka longiing.
Hakajuh ka por naka liang ka NPYF kala kyrpad ruh ïaki bor bahalor ban shimkhia ban pynioh ïaka hok ïa katei ka longiing kaba ka ngat ha katei ka apot khnang ba ki kmie ki kpa bad ki bahaiingshem jong katei ka samla kin ioh ka jingshai, namar kum ka seng kam kwah shuh ba kum kitei ki jingjia kin nang ïai jia nangne shakhmat bad ruh ba ka sorkar kan thaw ki lad ki lynti ban pynthikna ïaka jinglong shngaiñ jong ki samla pule kiba pule shabar jylla.

Leave A Reply

Your email address will not be published.