Nongpoh, Naitung 10: Da ka jingsngewkhia kaba jur halor ka jingleh khlem akor ki nongleit nongwan kiba bret jaboh bad bret ïa ki bitor kyiad hapoh ka Jingkieng Flyover ha Umïam, ka Shnong Pyllun ryngkat ki Seng Longkmie bad ka seng HITO Umïam Area bad na ka District mynta ka sngi ki la leit ban pynkhuid ïa ki jaboh bad ruh ban lum ïa ki bilor kyiad ba la bret pathar da kita ki nongwan shangkai suwari ha katei ka jaka.
Kum ban pynkynmaw, katei ka Jingkieng Flyover ka don harud ka Pung Umïam bad bun ki paidbah ki ju leit ha katei ka jaka kaba long ka jaka jngohkai pyrthei, hynrei ka ei kaba ktah pat ïa ka imlang ka sahlang ka dei ka jingbret pathar ïa ki jaboh naduh ki bitor kyiad bad ruh ki kam sniew ba la ju leh da kita ki nongwan shangkai suwari khlem da pyrkhat pat ïa ka bha ka miat bad ka khuid ka suba hapoh katei ka jaka.
Dei halor kane ka nongrim, ki Nongïalam ka seng HITO Umïam Area ryngkat ki nongïalam na ka District bad ba la ïa don lang ruh naduh ki bor shnong, ki seng longkmie ki la mih mynta ka sngi ban pynkhuid ïa ki jaboh ba la bret pathar ha jrong jong katei ka Jingkieng Flyover kaba don ha Umïam.
Haba ai jingkren ha kane ka sngi naduh u Rangbah Shnong ka Shong Pyllun, u Bah M. Warbah bad u President ka HITO Umïam Area, u bah G. Lyngdem, ki la pynpaw ka jingsngewkhia kaba jur halor ka jingleh khlem akor kito kiba wan shongkai ha katei ka Flyover namar kumba la lap ym tang ba ki bret ïa ki jaboh bad ki bitor kyiad, hynrei ki pynpait ruh ïa ki bitor kyiad kaba ktah ïa khuid ka suba jong katei ka jaka.
Na ka liang kitei ki nongïalam Shnong bad ki nongïalam ka Seng HITO hadien ba la dep ban pynkhuid ïa katei ka jaka ki la buh ruh ka jingmaham kaba jur sha baroh kiba wan shangkai ba kim dei ban leh jaboh ha katei ka jaka bad lada lap nangne shakhmat kin kem bad kin aiti beit sha ki briew jong ka aiñ ban leh ïa kaba donkam.
Shuh shuh, ki la buhr uh ka jingkyrpad ïa ki bor pulit ka Umïam ba kin pynlong ïa ka jingpahara man la ka por ha katei ka jaka bad lada ki lap ïa kino kino kiba leh khlem akor ki dei beit ban kem bad ban pynshitom, namar kum ka bor shnong ki sngewdon jingtieng ruh ba da ka jingailad ban shong ha katei ka jaka kin mih bun jaid ki jingsniew kiba ktah ïa ka imlang ka sahlang.
