Leit kynduh biang ka ‘Dorbar Ki Waheh Kur’ ïa u CEM ban ithuh noh ïa ka aiñ ki seng Kur

Jowai, K.Lyngkot 15: Ka Dorbar Ki Waheh Kur, Ri Jaiñtia, mynta ka sngi 15 tarik u Kyllalyngkot ki la leit ban ïakynduh biang ïa u CEM ka Jaiñtia Hills Autonomous District Council (JHADC) ma Thombor Shiwat na ka bynta ban ithuh noh bad ban thaw ïa ka aiñ Kur jong ki seng Kur kiba don hapoh ka Ri-Lum Jaiñtia.
Na ka liang u President ka Dorbar Ki Waheh Kur, Ri Jaiñtia ma Khroo L. Pariat ha ka jingkren bad ki lad pathai khubor ula ong, ‘da ka jingsngewkhia ïa kane ka kam ki la leit ban mih biang mynta ka sngi sha ophis ka Council ban ïa kynduh markhat ïa u CEM ka JHADC’ bad ha ka jingïakren bad ki nongïalam ki Waheh Kur u CEM ula kular ban khot noh daka ‘Executive Order’ ban pass mardor ïa ka Resolutiuon na ka bynta ban ïoh thaw ïa kane ka aiñ.
Shuh shuh ula ong na ka liang Ka Dorbar Ki Waheh Kur, Ri Jaiñtia ka don ka jingkyrmen skhem hadien ka jingujor jong ku ha kine ki bnai ba la dep ba ka Council kan pyntreikam noh ïa kane ka aiñ hapoh ka 25 tarik u Kyllalyngkot hashwa ban pynbna ïa ka Election MDC, hynrei kane jingkyrmen ka dang sahkut haduh mynta.
Ka Dorbar Ki Waheh Kur, Ri Jaiñtia ha kane ka sngi ka la ïoh lad ban ïakren bad u CEM halor ka jingïoh rung khyrthep ki mynder Ri kum na Myanmar bad ki Garo na Bangladesh bad la dawa jur na u CEM ban hukum mardor ïa ki Waheh Shnong, ki Dolloi ba kim bit ban ai syrnot NOC sha kitei ki jaitbynriew kiba kam ïalade kum ki trai shnong namar kane ka lah ban buh jingma ïa ka jaitbynriew.
Ki la buh ruh ka jingkyntu na u CEM hadien ba la dep ban ithuh ïa kane kane ka aiñ dei ban ai ka order sha manla ki Deputy Commissioner jong ka West bad East Jaiñtia Hills District khnang ba kin pyntreikam ïa ka, da kaba kren shai ba ka ophis JHADC kam dei ban ap tad haduh ba kin mih sha surok ban pyrshah ïa ki jingdawa.
Ula ong ka daw ba la pynslem shuh shuh ïa ka jingpyntreikam ïa ka aiñ ka long kiba bun ki nongïalam Kur ki bym pat pyndep ban pynrung kyrteng namar ba ka dei ruh ka sien ba nyngkong ïa ki kaba ki hap ban khot shwa ïa ki jingïalang, nalor kata wat ki staff bad ki ophisar jong ka Council ki don hapdeng ka jingklumar namar ba ym pat don ki hukum kiba btah ïa ki katkum kyndon aiñ.