Shi snem shim por ban shna ïa ka surok rong kaba jrong 1.10 km ha shnong Jalyiah

Khliehriat, K’ lyngkot, 15: U Myntri ka Sorkar Jylla u Bah Kyrmen Shylla uba long ruh u MLA jong ka Khliehriat Constituency ha ka sngi Baar ryngkat bad u Deputy Commissioner jong ka East Jaiñtia Hills District u Shivansh Awasthi ki la plie paidbah ïa ka surok shnong kaba jrong 1.10 kilomitar kaba dang shu dep shna ha ka shnong Jalyiah.
ïa u maw sah kynmaw la plie da u Bah Shylla bad la ot ïa u ribon kum ka dang ka jingplie paidbah ïa ka surok da u Awasthi. Haba kren kum u Kongsan u Bah Shylla u la kyrpad ïa ki kali kiba kit jingkit ba kim dei ban kit palat pud haba ki ïaid na ki surok shnong khnang ba ka surok kan ym jot.
U ong ruh ba kane ka surok ka long ka jingkyrkhu ïa ki paidbah nongshong shnong Jalyiah bad ïa baroh kiba leit ba wan na kane ka surok.
“Ym dei ba nga bishni ïa ki kam ki jam jong ki lok ki jor, namar bunsien ki don ki kali kiba kit palat pud, kumta lada shah ka lad nga kyrpad ïa ki paralok ba lada dang don ka lad ne ka surok ban ïaid sngewbha wat ïaid na ki surok shnong hynrei ïaid noh na kiwei kiwei ki jaka ki ba kham skhem ka surok khnang ba ki surok shnong kin neh,” la kyrpad u Bah Shylla.
Na ka bynta ka jingpynkhreh ka shnong Jalyiah ïa ka lympungbah ka ban sa long ha u snem 2028 u Bah Kyrmen Shylla u la ong, “watla ka samoi long MLA jong u kan kut noh ha u snem 2028 hynrei kum u nongmihkhmat un nang ïai trei bad shakri na ka bynta ban pynbit pynbiang na ka bynta ka lympung bah kaba sa long ha u snem 2028 khnang ba ka kam jinglehniam kan ïaid beit ïaid ryntih.”
“Ka projek jong kane ka surok ka dei ka projek ba la ïatrei lang da ki nongtrei Job Card, na ka ophis u BDO Wapung C&RD Block, ka Meghalaya Basin Development Agency (MBDA). La shim ïa kane ka jingïatrei synrop lang dei namarba ki don ki kyndon kiba donkam kiba dei ban don khang ban ïoh ïa kane ka surok ha shnong Jalyiah,” ong u Bah Shylla.
U la ai khublei ïa ki nongtrei jong ka skhim MGNREGS kiba la ïatrei lang ha kane ka projek shna surok, kiba la noh syniang sha ka imlang ka sahlang watla ka dei ka jingsiew bainong kaba rit hynrei ki la don bynta lang ha kaba shna ïa kane ka surok.
U Deputy Commissioner ka East Jaiñtia Hills District u Shivansh Awasthi u la pynsngew ba kane ka surok ha shnong Jalyiah ka dei kaba la trei synrop ba la bei tyngka na ka skim MGNREGA, na ka tnat MBDA bad na ka DMF.
“Nga ai khublei ïa u Waheh Shnong ka Jalyiah uba la trei shitom bad uba la ai ruh ka jingïatreilang. Nga ai khublei ïa u BDO Wapung C&RD Block u Dr T.Shylla bad ïa baroh ki nongtrei Job Card kiba la ïa don bynta lang ha kaba pyntrei ïa kane ka surok bad nga kyrmen ba ngin sa nang ïoh shuh shuh shibun ki projek kiba ngin plie,” ong u Shivansh.
U la pynsngew ruh ïa ka jingthrang bad jingangnud u Myntri Rangbah ka Jylla u Conrad Sangma uba don ka jingthmu ban kyntiew ïa ka jylla ym tang ha kaba kyntiew ïa ka khaïi ka pateng hynrei u angnud ruh ban kyntiew ïa ki jaka pule, ki jaka ai jingsumar, ki Aganwadi Centre bad kiwei kiwei ki lad pynroi na ka bynta ka lawei kaba phyrnai.
U Waheh Shnong ka shnong Jalyiah u Bah Shillong Dkhar, u la pynsngew sha ki paidbah ba ïa kane ka surok kaba 1.10 kilomitar la pyntrei ha ka jinglut kaba kot T.63,50,000 lak ha kaba T. 21,0000 lak tyngka la pyntrei na ka skhim MGNERA, T19,50,000 lak la bei na ka Meghalaya Basin Development (MBDA) bad T.2, 000,00 lak na ka District Mineral Funding.
ïa kane ka surok la trei lang da ki dkhot jong ki nongtrei Job Crad na ki 304 tylli ki longïing kiba la trei 8823 sngi.
Kum ban shu pynkynmaw hangne, na ka bynta kane ka surok, ladep ban plie ïa u mawnongrim da u Bah Kyrmen Shylla naduh ka 31 tarik, Kyllalyngkot 2024 ha kaba la ïa don ryngkat lang ruh u Deputy Commissioner barim ka East Jaiñtia Hills District u Abhilash Baranwal, u BDO jong ka Wapung C&RD Block u Dr T.Shylla, u Waheh Shnong Jalyiah u Bah Shillong Dkhar, u Project Director DRDA Khliehriat u Bah G. Warjri bad kiwei kiwei.
Ha kane ka sngi, la ai jingkren da u BDO Wapung C&RD Block u Dr T.Shylla, u MDC ka Muthlong-Sohkymphor Constituency u Bah Lomris Lyngdoh bad kiba la ïadon lang ha kane ka sngi ki kynthup ïa u Executive Engineer ka tnat PWD Khliehriat u S.Mulvia, ki heh ophisar na ka tnat Basin East Jaiñtia Hills District bad ki paidbah nongshong shnong.