Jowai, Lber 28: Ha ka 27 tarik mynta u bnai ki nongïalam ka WJSU, na ka East Satpator Sub Circle hapoh ka jingïalam u President ka Sub Circle u Youmiki Syrti haka jingïadon ryngkat ka Finance Secretary ka samla Rikular Suchen, Sumar Ruphi President Moopyut Sub Circle, ki la leit jurip (Inspection) ïa ka Residential School building kaba don ha harud ka shnong Pdengshakap, Amlarem Civil Subdivision.
Ka kane ka jingleit jurip ka seng la lap 3 tylli ki building skul kiba la pait lut ki ïit bad jingkhang bad ka rukom shna ïa kitei ki building kiba long sub standard kaba syrkhei haduh katta katta.
Ka seng ha kawei ka liang ka sngewlyngngoh hadien bun bun snem ba la dep ïa ki building skul, hynrei ka sorkar kam plie shuh ïa katei ka residential skul khnang ba ki khynnah skul ka thaiñ bad ka District hi baroh kawei kin ïoh mat ïa kum kitei ki jingnang jingtip katkum ka juk ba mynta.
Ha kawei ka liang, ka seng ka buh jingkylli jia aiu ïa ka Education Department ne sorkar jylla hi baroh kawei, kumjuh ka sorkar ka don policy tang ban shna ki building hynrei ban pyntreikam ïa ki building kam don pisa, ki shna dep ïa ki building ha ka jaka ba kin pyndep shwa ïa ka approach roads na surok Muktapur shaduh ba don kitei ki building skul.
Ka seng na East Satpator Sub Circle ha ryngkat ka seng kmie shen kin ïa shong pyrkhat bad shim ïa ka rai ban buddien ïa kane ka skul ïngjah (ghost school) khnang ba ki paidbah ka thaiñ kin mat ïa ka roi ka par ha ka liang ka pule puthi.
Kane ka long katkum ka jingpyllait khubor na u Saman Shylla, Publicity Secretary WJSU, East Satpator Sub Circle.
