Ka sorkar ka dei ban hikai ruh ïa ngi kumno ban pynneh, ban tyngkai bad sumar ïa ka mei mariang: Chief Secy. barim

Shillong, Risaw 18 : U Chief Secretary barim ka jylla u Bah Barkos Warjri u la ai ka jingkyrshan kaba pura ïa ka jingïakhih jong ka Joint Action Committee (JAC) Against Shillong Ropeway ha Shillong Peak, Riat Laban bad ïa kane u la pynpaw ka jingkren kaba u la shim bynta ha ka jingïalang kaba lyngkot jong ka JAC kaba la pynlong ha khyrdop jong ka jaka ba la pyntrei ïa ka Ropeway ha Riat Laban hadien jong ka jingïaid rally kaba jar jar ba la pynlong ha ka sngi Saitjaiñ bad ha kaba ïa kane ka jingïakhih pyrshah Ropeway la ai jingkyrshan pura ruh da ka Greentech Foundation ka jylla.
Haba kren ha ka jingïalang u Bah Warjri u la ïathuh ba hadien ba u la ïohi lyngba ki Watsapp bad kiwei ki lad pathai khubor u pynpaw ba u pang ka dohnud ban ïohi ïa ka jingshah pynjulor jong ki dieng bad u Lum Shyllong uba don ka khlaw kaba rben, ki sim ki doh, ki mrad ki mreng, nangta ki jingthung kum ki dieng syntiew kiba itynnad.
“Ha ki por ba ngi dang khynnah ngi ju rung bha sha kane ka khlaw, ki don ki umdih kiba sngur, ka um kaba mih ruh ka tuid na ki maw shyiap kiba long ka filter kaba ngi shu dih beit. Nangta u Lum Shyllong u la long ka jingbsa um ïa baroh kawei ka sor Shillong. Ka Wah Umkhrah, ka Umshyrpi, ka Wah Umiam, ka Dam Mawphlang, baroh kidei shi bynta na ka tyllong um kaba mih na une u Lum Shyllong,” ïathuh u Bah Warjri.
U la ong ba lada ym dei na une u Lum Shyllong yn ym lah ruh ban ïoh ka bording bad ka umdih na ka bynta baroh ki nong Laban bad khamtam eh ïa ka sor Shillong baroh kawei.
“Une u Lum Shyllong u la long ka tyllong um ruh shaduh ka wah Bramaputra, ka Wah Umngot Dawki, bad shaduh Bangladesh bad kaba kongsan tam kadei ba lyngba une u Lum Shyllong ngi ïoh ïa ka bording,” bynrap u Bah Barkos.
Nangta u la ong ba ha ki skul, ha ki jaka pule bapher bapher la kyntu ïa ki khynnah ba ki dei ban pynneh ïa ka mariang, ban pynneh ïa ka jingjyrngam, ban ym pom pathar ïa ki dieng, bad kumjuh ruh ka sorkar ka bthah ïa ki nongshong shnong ban pynneh ban tyngkai ïa ka mei mariang bad ki khlaw ki btap.
“Hynrei mynta pat ngi sngewsih bad sngewpangnud ban ïohi ba ka don ka jingpom ïa ki dieng ha une u Lum Shyllong bad kumta ngi kyrpad ïa ka sorkar ba kan hikai lem ïa ngi ban pyneh, ban tyngkai ïa ka jingjyrngam jong ka mei mariang, hynrei lym kumta kan sa ktah ïa ka sor Shillong baroh kawei,” ong u Bah Warjri.
Ha kane ka sngi na ka liang jong u, u la pynpaw ka jingkyrshan kaba ratbah ïa ka JAC kaba la pynlong ïa kane ka jingïakhih pyrshah ïa kane ka projek Ropeway naba kan ktah ïa ka mariang bad khamtam ïa ka tyllong umbam umdih ha kane ka jaka bad kyntu ruh ïa ka sorkar ba kan sngap lem ïa kane ka jingdawa jong ki nongshong shnong khnang ba kan ym ktah ïa ka pateng ban wan bad ba kan ym pynjynjar ïa ki longdien mandien.
Ha kawei pat ka liang ha kane ka jingïaid rally kaba jar jar la ïohi ba dei tang ki Khasi suda kiba ïa shimbynta ha kane ka jingïaid rally naduh basdang haduh bakut ba kut ka jingïalang ïalum lang hakhmat khyrdop jong ka jaka ba la pyntrei ïa katei ka Ropeway Project, watla ka Laban Constituency la tip ba ka dei ka General Assembly Constituency kaba la don bun ruh ki nongshong shnong ki bym dei ki Khasi hynrei lah ban ong ba kim pat sngewthuh ïa ka jingdonkam ban ïada ïa u Lum Shyllong ne ka jinglah ban duh ïa ka um.