Khlem ïoh NOC, khlem Laisen Khaïi, ka jingpyntrei ïa ka Shillong Ropeway project la ïaid shakhmat: JAC

Shillong, Risaw 18: “Phim don wat ïa ka NOC, phim don wat ïa ka trading license hynrei ka kam ka la ïaid. Hato ka long kaba dei. Phi la ïaid pyrshah ïa ka aiñ bad ka aiñ jong u briew. Kaba kham shyrkhei ka long ba phi la ïaid pyrshah ïa ka aiñ U Blei uba la ai ha ngi ïa une u Lum ban pynneh pynsah. Wat ktah ïa kane namar une u lum u long kaba kyntang,” ong ka President jong ka Joint Action Committee Against Shillong Peak Rope Way Project and for the protection of the Shyllong Catchment ka Kong Deborah Marbaniang haba kren ha ka jingïalang hadien ba la pyndep ïa ka jingïaid rally kaba jai jai na Last Stop Laban shaduh sha Riat Laban kaba don ka jaka ba la pyntrei ïa kane ka projek Rope Way.
Ha kane ka jingïaid rally kaba la rah da ki jingthoh pyrshah bapher bapher bad ki jingpyrta pyrshah na ka liang ka Joint Action Committee (JAC) Against Shillong Ropeway ka la dawa ba ka sorkar ka dei ban pynkynriah noh ïa katei ka projek na Laban Pyllun sha kawei pat ka jaka bad ka la aipor ruh 10 sngi ba ka sorkar ban pyndam noh ne scrap ïa kane ka projek bad lada kam sngap kin nang pynjur shuh shuh ki jingïakhih da kaba khot lang ruh ïa baroh kiba sah ha Sor Shillong kiba shah bsa um na u Lum Shyllong manla ka sngi bad la ïathuh ha ka jingïalang ba ka shnong Laban kaba mynshwa kam ju donkam ban thied um, hynrei mynta ha ki bnai Jylliew bad Naitung bad kiwei ruh ki bnai la hap ban thied um ki longïing kumta la sngewthuh ba ka jingpynjulor ïa u Lum Shyllong ka la sdang ban ktah khamtam ki tyllong um.
Da kaba pyrta bad rah ki Pla Card ba pyrshah ïa ka Ropeway, ki nongshong shnong ki la maham ba kin pynjur ïa ka jingïakhih lada ka sorkar kam jubab hapoh 10 sngi.
Katba ka Secretary ka JAC ka Dr. Linda Marbaniang ka la ong, “Ngi la ai por 10 sngi ïa ka sorkar ba ka dei ban pyrkhat biang halor kane ka projek bad ban rah shawei pat ka jaka kiba donkam ïa kane, namar bun ki nongrep kiba sah sha ki jaka bym lait surok ki donkam ïa ka Ropeway. Kane kam dei ka jaka kaba biang ban long kum ka jaka jngohkai pyrthei.”
Ka la bynrap, “Ngi la ai por ïa ka sorkar 10 sngi ban shim ïa ka rai. Lada kim sngap ïa ngi, ngin pynjlan ïa ka jingïakhih jong ngi. Ngim kwah shisha ban ïakhih hangne, kane ka Project kam dei ka jingmyntoi ïa ki paidbah hangne. Ngi ki nongshong shnong ngin sa mad jingeh.”
Ka Dr Linda ka la ong ba ka JAC kan sa rai, kan leit tied ne em ïa ka jingkhang jong ka Meghalaya High Court lada ka Sorkar kam shimkhia ïa ka jingdawa. “Ngin hap ban shong jingïalang bad pyrkhat kaei ka sienjam kaba hadien ngin shim” ka la bynrap.
Haba kyntait ïa ka jingkam jong ka sorkar ba kam don kano kano ka jingktah ïa ka mei mariang, ka la ong ba ka jingpom ïa ki dieng na ka bynta katei ka projek ka la dep ban wanrah ïa ka jingkyrduh um ha katei ka thaiñ.
“Ngi hap ban sngewthuh shai. Phi lah ban ong ba kam don jingktah ïa ka mariang. Phi sah ha Shillong. U slap uba ngi ju ïoh um dei shuh kum mynshwa. Ki la pom ïa ki dieng bad kane ka la ktah ïa ka jinglong ka suiñbneng. Haba ym don slap, ym don um. Ki tyllong um hangne kin sa tyrkhong noh,” ka la ïathuh.
Halor ka jingtyrwa ban ai jaka ban thung dieng kum ka bai lutksan ba la pom ïa ki dieng, ka la ong, “Nga sngewsih shibun, ngim don ïa kata.”
Haba batai halor ka jingpynslem jong ka JAC ban mih pyrthei ban ïakhih pyrshah ïa ka Project, ka la ong ba ka Sorkar la buh ïa ki nongshong shnong ha ka jingdum bad ym shym la pynlong ïa ka Public Hearing.
“Haba ki sdang, kim shym la khot ïa ka Public Hearing. Ngim tip. Ngim pyrshah ïa ka roi ka par. Hynrei hadien ba ki la pom ïa ki dieng, ka la don ka jingduna um ha man la ki jaka. Ngi la sngewthuh ba ka dei namar kane,” ka la ong.
“Ka la shim por ïa ngi ban mih madan namar ngi la hap ban leit sha ki tnad bapher bapher ban wad ïa ki jingshisha. Ngi la hap ban file RTI, ban ïoh ïa ki kot ki sla. Ngim lah ban mih madan ban ïakhih khlem ki kot ki sla bad khlem ka jingpynshisha,” ka la bynrap.
Ka la buh jingkylli ruh kumno la pynïaid ïa ka jingtei khlem ki jingbit ba donkam.
Da kaba kynnoh ïa ki 7 tylli ki Dorbar Shnong ba ki la shukor ïa la ki nong shong shnong, ka la ong, “Ki la leh ïa kane ha lyndet jong ngi. Kim shym la pyntip ïa ngi, kim shym la khot ïa ngi na ka bynta ka Public Hearing, kim shym la ïakren bad ngi la ngi kwah ne em ïa kane ka Project. Ka dei ka jinglehbeiñ ïa la ki nong shong shnong.”
Ka la ong ba ka JAC ka kloi ban leit sha ka Public Hearing lada khot da ka sorkar. Ha kane ka jingïalang ka la mih ruh ka jingkynnoh ba ka sorkar ka la dep ban ai T. 3 klur sha ki nongïalam shnong na ka bynta kane ka projek bad dei halor kane ba ki la soi haduh 22 ngut ban ai jingbit ïa kane ka projek, kumta ha kane ka jingïalang hadien ka jingïaid rally ki la dawa ïa kine ki 22 ngut ki nongïalam shnong ba lada kim pyndam noh ïa katei ka jingïasoi ba khlem da pyntip sha ki nongshong shnong kidei ban hiar shuki don burom na ki kam ba ki bat ha ki shnong bapher bapher ne ha ki 7 tylli ki dorbar shnong.
Ha ka jingïalang la pynsngew ruh ba lada ka sorkar ka pynsangeh noh ïa kane ka projek na ka liang ki nongshong shnong ki dang lah ban maramot bad ban thung ïa ki dieng ha ki jaka ba la pom bad ba la shah pynjulor.
Ia ka jingialang la pyniaid da ka kong Vene Mawlong, la ioh jingkren na ka kong Lala, kong Batti,, Sakhida, Bah H B Nonglang Green-Tech Foundation bad kiwei kiwei.