Lap ki Nongrung krem bun tylli ki krem thymmai kiba ym pat paw pyrthei ha East Jaiñtia Hills

Shillong, Lber 13: Ka jingrung sha ki krem ki kroh kaba la pynlong mynta u snem 2024 kaba la tip kum ka Caving in the Abode of the Clouds Expedition ka la sdang naduh ka 28 tarik u Kyllalyngkot, 2024 ka ban kut haduh ka 22 tarik u Rymphang, 2024. Kane ka kynthup ïa ka prokram kaba shi taïew kaba la thmu ban pynpaw ïa ki jinglong kyrpang ki shnong kum ka Sakhain kaba don ka jingjngai kumba 5 km na South jong ka shnong Sutnga kaba ha East Jaiñtia Hills District. Kane ka jingleit sha kane ka shnong ka la long naduh ka 29 tarik u Kyllalyngkot 2 tarik u Rymphang 2024.
Hadien katei la pynbud sa ka jingleit peit jaka kaba 2 taïew shiteng kaba dei ruh ka jingleit kaba kongsan sha ki thaiñ sawdong ki shong kum ka Tlang Moi bad Muallian, kiba baroh artylli ki don hapoh ka bynta ba shathie jong ka Shnongrim. Kane ka jingleit ka la sdang naduh ka 3 tarik u Rymphang haduh ka 21 tarik u Rymphang, 2024.
Kumba ka la long ka kam jong ka jingleit rung krem kaba la tip da ka Caving ha ki ri jong ki lyoh bad kiwei pat ki jingleit kiba bun jait bad ha kane ki la don ki kynhun nongrung krem kiba la wan na ri UK, Ireland, Austria, Netherlands, Germany, USA, bad India ha kaba la ïashim bynta da ka Meghalaya Adventurers Association bad kiwei pat ki thaiñ jong ka ri India kiba kynthup ïa ki 8 ngut ki riew shimet bad ka kynhun kaba na ka jylla kaba ïadon kumba 29 ngut.
Hapoh ka thaiñ Sakhain, la lap ba ki la don 10 tylli ki krem kiba thymmai kiba don ka jingjngai kaba 1,458m. Napdeng kine dei ka Ur Selle kaba jngai kumba 373m ki jaka rung jaka mih, ka Urluri kaba jngai 346m bad ka Rong Kso 3 kaba don ki lynti ïaid kiba jngai 314m. Baroh kine ki krem ki don ha ki kliar jong ki maw shyiap ha kaba ka shnong Sakhain ka don bad ha kaba baroh ki don lang ruh ki kshaid hapoh kiba ïaid lang bad ki wahduid. Ka jingleit sha kine ki jaka ka la jan long kaba la jandep.
Hapoh ka thain Muallian/Tlang Moi, ïa kane ka kam la leh kumba leh ha ki snem 2020, 2022, bad 2023 bad ka thong ka long ban lap ïa ki krem bad kiwei pat kiba thymmai ha kaba ha ki snem ba mynshwa la lap ïa ki jaka rung tangba kiba khlem lah leit ban rung. Ha kaba ïadei bad kiwei kiba la tip mynshwa bad kiwei pat kiba dang lah ban pyndep dang shiteng kiba la lap ba ka don ka wah napoh ka Krem Rynjangor Retdung Khur kaba la ïar na ka 20,445m sha ka 23,219m kaba la sdang napoh ka krem kaba 7 ha ka ri India bad kaba jrong tam kaba mih sha ka krem kaba la ithuh kaba long kaba 3 ha India bad kaba 2 ka krem kaba jrong tam kaba don hapoh ki jaka ba don ki maw shun.
Ka Pynnoh Um Sngad/Ram Khur System kaba la pynïar na ka 14,951m sha ka 20,459m kaba la shim na ki krem kiba la long ha ka kyrdan kaba 8 ha ri India bad kaba 7 ka krem kaba jrong tam lane ka 6 krem kaba poi ha ka kyrdan kaba 6 kaba don hapoh ki krem mawshun. Hynrei ka long pat kaba sngewsih ba khlem la lah ban pynpoi sha ka thong ban ïoh leit pyndep lut ïa ka Retdung Khur bad ka Pyynod Um Sngad/Ram Khur ka ban thaw ïa ka 45+km kaba ha Meghalaya watba kitei ki artylli ki jrong kumba palat 150/200m. Ka jingthmu ban leit sha Um LadawtoRetdung Khur kane ruh ka khlem long kaba jop da kaba shu tih ne ban kiew.
Ki la don pat ki krem kiba thymmai kiba la ïoh ban leit rung kiba ha ka thaiñ Muallian kum ka Rebung Kung 2 kaba jrong 1,896m ki lynti ïaid bad ka Rebung Kung Maul kaba don 1,604m. Kine baroh artylli ki krem ki long kiba itynnad lyngba ki wahduid kiba la ohshrong. Ban bynrap shuh shuh ki la don sa kumba 6 tylli ki krem kiba thymmai kiba la lap.
Katto katne ki krem ba thymmai kiba la lap ki long kiba jylliew bha ha kaba kaba jrong tam ka dei ka Trevor Khur kaba don ka jaka rung kaba jylliew kumba 152m bad kadei ka krem kaba jylliew tam ha Meghalaya ne India kaba la lap haduh mynta.
Ha kane ka jingleit rung krem kaba kut jong u snem 2024 baroh kiba la lap ki don ka jingjrong kaba 13,895m. Kane ka la wanrah ka jingkheiñ jong ka jingjrong ki krem kiba la lap bad kiba la dep ban dro ïa ka map ha Meghalaya naduh ka jingsdang ban lap bad ban leit wad ïa ki krem katkum ka juk kaba mynta naduh ki snem 1992 kiba baroh ki long 551 km.
Ka Association ka ai khublei ïa Meghalayan Age Ltd. bad ka Directorate of Sports and Youth Affairs, ka sorkar jylla, ïa ka jingïaibteng ban kyrshan bad ban ïoh pynrung ha ki jingthoh halor ki krem jong ka Meghalaya kiba la wanrah ki jingmih kiba khraw, ong ka kyrwoh ba la phah da u Bah Brian D. Kharpran Daly, General Secretary.