Shillong, Rymphang 13 : Ki Sngi ki la nang jan bad ki tiket ki la jan lut na ka bynta ka jingwan kyrïuh bad pynshongshit jong u nongrwai ba pawnam ka pyrthei u Calum Scott ka ban long ha ka 20 tarik Lber 2024 ha Lariti Hall kaba ha Mawdiangdiang New Shillong.
La ïathuh ba 70 % ki tiket ki la lut hynrei na ka bynta kito ki bym pat ïoh ïa ki tiket jongki ki lah ban thied noh kloi na www.rockskitickets.com ïoh phi babe namar kane kan long ka concert ban sah jingkynmaw namar ka long ruh ka sien ba nyngkong eh ban pynlong ïa ka Indoor Concert haba ki nongrwai ba pawnam ki wan sha ka jylla Meghalaya.
Ha ka jingpyrshang ban wanrah shuh shuh ïaki jingpynbyrngia da ka Rockski EMG, na ka bynta kito kiba thied ïa ki tiket ban wan sha ka Concert kin ïoh ruh ban ïadon bynta ha ka Reality TV Show kaba la jer kyteng “Hills on a Plate-Meghalaya” kaba dei ka Episode ba nyngkong na ki 7 tylli ki Episode. Kane ka dei ka jingïatrei lang ka tnad Tourism jongka jylla bad ka Rockski EMG kaba ïadei bad ka jingriewspah ha ka bam ka dih bad kiei kiei ki jingitynnad ba tynrai kiba ym pat ju ïoh sngew koid ha ka jylla.
Kin don ki nongbishar ha kane ka Show ba kynthup ïa ka Sarah Todd ka Masterchef na Australia, Ardahun Passah bad William Diengdoh. Kine ki prokram kin kynthup ïa ki jingïakob shet jingshet bad kiwei kiwei ki jinglong tynrai ba riewspah ka jylla bad ban pynbit pynbiang ïa kane ka prokram kin long u Gordon Thabah bad Abigail Pamei bad ki ban ïashim bynta ki long Artet Kharsati, Ivan Suting, Daei Suchiang,Nambie Marak, Tanisha Phanbuh, Uttam Thangkhiew, bad Adonijah Lyngdoh.
Hadien katei ka concert jongu Calum Scott kan don sa ka Culinary Extravaganza ha Nanpolok ha ka 21 bad 22 tarik Lber. Ha katei ka prokram kiba wan ïashim bynta ki lah ban ïakren bad ki nongshet ba pawnam Jason White bad kiwei kiwei ki ban wan na kylleng ka ri India.
Dei ruh ha katei ka jaka ba ka tnad Tourism jongka jylla kin pynbna ïa ka tarik na ka bynta ban pynlong ïa ka Cherry Blossom, ki nongjop jongka Megha Music Contest bad kiwei kiwei ki prokram.
