Shillong, Lber 13 : U Nongïalam ki MLA Congress ba dei ruh u nongïalam ka Liang Pyrshah, Bah Ronnie V Lyngdoh ha ka sngi Balang u la ther kylla ïa u nongïalam ka TMC, Dr. Mukul Sangma halor ka jingkynthoh pyrshah ïa ka Congress haba ïadei bad ka jingjied ïa ki kyrtong ban aireng ha kane ka elekshon MP na Shillong bad Tura watla ki don lang ha ka India Bloc.
Haba kren bad ki lad pathai khubor, u Bah Ronnie u la ong ba ka TMC ka la ïaid shakhmat ban pynbna ïa ki kyrtong MP na ki 42 tylli ki constituency ha West Bengal khlem da ap ïa ka Congress hynrei ynda la dei pat ka pali ha Meghalaya, utei u nongïalam ka TMC u kynnoh ïa ka Congress.
Shuh shuh u ong ba ka jingkren jong u Dr. Mukul ka pynlyngoh ruh khamtam haba ka West Bengal ka don haduh 42 tylli ki seat katba ha Meghalaya pat ka don tang ar tylli ki parliamentary seat. Kumta, u la ong ba lada ki ar seat na Meghalaya ki kham kongsan ïa ka TMC bad ki 42 tylli ki seat kim da donkam, kata hi ka la dei ka jubab kaba kham shai.
“Lada ka TMC ka ong ba ngi la ïaid shakhmat ban pynbna ïa ki kyrtong ha Meghalaya kumta kam kwah shuh ban ïatrei lang bad ka Congress, te balei pat kim pynbna ba ka la don ka jingïa pynbeit ïa ki constituency ban treilang ha West Bengal. Nga kwah ban buh jingkylli ïa ka TMC kaba dei shi bynta jong ka INDIA Bloc balei kam pdiang ïa ka jingpynbeit ïa ki seat ha West Bengal. Lada ki leh ïa kata ha West Bengal ki lah ban leh ruh ha Meghalaya. Hynrei hato dei ba ki la don ka jingïapynbeit sop sop bad ka BJP,” u la bynrap shuh shuh.”
Shuh shuh u la buh jingkylli ruh ba kaei ka jingïohnong jong ka TMC da kaba kyntait ban treilang bad ka INDIA Bloc, kata ka Congress ha kane ka elekshon MP. “Ne kadei na bynta ka jingïohnong jong ka BJP khnang ba kan paw ba ka BJP bad ka TMC kam don kano kano ka jingïadei,” u la bynrap biang.
U Bah Ronnie u ong ruh ba ka BJP ka la tip bha ba ka TMC ka don bun bha ka jingïoh vote, kumta lada ki treilang ka vote jong ka liang pyrshah kan pharia noh bad kane kan pynïohnong ïa ka BJP khamtam haba ka vote jong ki rit paidbah ka bun bha ha katei ka jylla.
Nalorkata, u la ong ba kaba sah mynta ka shong ha ki paidbah ban bishar ïa ka party bad jied ïa ki party kiba ïatrei lang na ka bynta ka jingsynshar kaba laitluid.
