Shillong, Lber 13 : U Deputy CEM ka KHADC, Bah Pynshngaiñ N Syiem ha ka sngi Balang u la ong ba kam dei satia ka Executive Committee kaba kwah ba pynjlan ïa ka elekshon MDC hynrei dei ka Delimitation Committee (DC) kaba pan por sa 6 bnai ban pyndep ïa ka jingpynbeit thymmai ïa baroh 29 tylli ki constituency.
Haba jubab halor ka jingkylli ba wanrah da u MDC ka Mawthadraishan, Bah Jambor War, u Deputy CEM u la ong, “Ka jingkwah jong ka Executive Committee haba thaw ïa ka Delimitation Committee ka long da ka thong ban pyndep noh ïa ka kam shwa ban kut ka samoi treikam jong ka Council. Hynrei khlem poi pyrkhat ka Committee ka khlem lah ban pyndep ïa ka jingkhmih lynti jongngi ka EC.”
Shuh shuh u ïathuh ruh ba ïa ka Delimitation Committee kam dei kaba leh da ka EC hynrei kadei kaba da ïoh jingbit na u Lat. U ong ruh ba dei lyngba ka jingthoh kaba wan na ka Committee kaba pan por sa hynriew bnai ba ka EC ruh ka la pyntip (forward) sha u Lat ban leh ïa kaba donkam.
Shwa kane, u la pynshai ruh ba ka EC kam shym la thoh ei ei la ki kwah ban pynjlan ne ynnai pynjlan ïa ka elekshon hynrei ki la shu phah beit ïa ka jingthoh kaba wan na ka Committee.
“Haba ngi la phah ka shong pat ha ka jingstad jong ka sorkar kumno kin leh. Hynrei u Lat ha ka notification ha u Rymphang u la mynjur ban pynjlan sa 6 bnai naduh ka 13tarik Rymphang 2024,” u la ong.
Ha kajuh ka por, u MDC ka Laban-Mawprem, Bah Mitchel Wankhar u la ong ba ka jingïakren kaba hakhmat ha ka phiah constituency kadei beit hapdeng ka Mawlai kaba heh tam bad ka Laban kaba khyndïat tam.
U ong ruh ba ha ka jingshisha ïa kaba heh yn shim bad pynngat noh sha kawei ka constituency bad ïa kaba khyndiat yn ai shuh. Hynrei u la ïathuh ba ha constituency jong u kam long kumta naba don ki bynta jong ka constituency kiba la bna ba yn rah noh sha Laitumkhrah watla ki paidbah ka Laban constituency ki dang kwah ban neh hajuh.
Hynrei haba jubab halor kane, u Bah Pynshngaiñ u la ong ba ïa katei ka kam ki shaniah beit ha ka Delimitation Committee ban leh ïa kaba donkam khnang ba ka jingphiah ïa ki constituency kan long kaba ia ïahap lang khlem da don shuh kiba heh ne rit than.
