Shillong, Lber 13:Na ka daw jong ka jingdon bun palat ki briew kiba nabar jylla kiba ïoh ban khaïi hapoh ki ïew kiba dang hab hapoh ka jingpeit jong ka Raid Marwet hapoh ka Hima Mylliem, na ka liang u CEM ka KHADC u Bah Pynïaid Sing Syiem u la pynpaw ka jingsngewkhia ba ha ki por ba u la leit ban khynra ïa ki laisen khaïi sha katei ka thaiñ u la lap hi da la ki jong ki khmat ba ki don sa tang 19 tylli ki longïing Khasi.
Ïa katei u la jubab ïa ka phang ba la wanrah da u MDC ka Sohra u Bah Titosstarwell Chyne uba la kren halor ka jingkyrduh kam bad ka jingbym ïoh kam ki samla Khasi wat hadien ba ki la pas ha kiba bun ki kyrdan.
Ha kaba ïadei bad kane na ka liang u CEM u la ong ba ka Council lyngba ka EC ka la pyrkhat ban wanrah noh da ka Skill Development Prokram ka ban ai jinghikai ïa ki samla ban ïeng bad seng kam lajong. U la pynpaw ruh ka jingsngewdiaw ban ïohi ba bun ki briew kiba heh nia tang ha ki rynsan Social Media ban ong ba ki ieid jait bynriew tang maki katba kim ju hiar pat sha madan ban leit knieh noh ïa ki kam ba la trei ne ki kam khaïi ba la leh da ki bar jylla.
Kumta u la kyntu ïa kito ki samla kiba ban pyndonkam ïa ki lad kiba la pynbiang da ka sorkar lyngba ka CM-Elevate bad kane ka Skill Development Programme ka ban sa pyntreikam da ka Council.
