Ka sorkar MDA ka leh kum ki ‘Gunda’ shu lute beit na ki paidbah sa nud shim kabu sa ki riewkieng atiar

Shillong, Lber 13 : U Nongïalam jongka Congress uba dei ruh u MP na ka jylla u ma Vincent H Pala mynta ka Sngi Balang u la kynnoh ba kane ka sorkar MDA hapoh ka jingïalam ka NPP ka leh kum ki Gunda ne ki Gang kiba shu lute beit na ki paidbah bad dei na kane ka daw ba sa nud ki riew kieng atiar ruh ban shim kabu.
ïa kane u la kren shisngi hadien ba ki pulit ki la ïoh ban pynpra ïa ka Sleeper Cell jongka seng HNLC kaba la thmu ban pynbthei bom IED ha nongbah Shillong bad Nongpoh hadien ba ki pulit ki la bud dien tyngeh na ka jingbthei bom IED ha Them ïew Mawlong ha ka miet 9 tarik mynta u bnai.
U la ong ruh ba ka shongsuk shongsaiñ ka la nang hiar ha ka jylla. U ma Pala u la ong “ Lada phi phai shilynter ka surok bah phin ïohi ba ka sorkar ka leh kum ki Gunda bad lada leit sha ki ophis sorkar ruh ki kam jongphi kin ym ïaid shakhmat khlem ka pisa. Lada phi niah kali ha surok bah lada phi kit dewiong phin hap siew bun bah ka pisa, lada kit kwai bad tympew ruh hap siew pisa bun, lada kit synsar ruh phin hap ban siew pisa bad lada kit syiar ruh hap siew haduh 30 hajar shi trok rit ( pick up) wat haduh u rnga bad kiwei kiwei hap ban siew ym duna ïa ka 500 tyngka”.
“ Kane ka jingleh jongka sorkar ban lute na ki paidbah ka la pynshlur ïa kiwei ki kynhun bad ki seng kieng atiar ban mih bad leh ïa ki kam beaiñ namar kumba leh beaiñ da ka sorkar kumta ruh kiwei ki bud nuksa ban ïoh pisa bad kane ka dei ka polisi jongkane ka sorkar ba mynta” ong u ma Pala.
“ Nga ngeit skhem ba kane ka polisi jongka sorkar ka la pyntroiñ ïa ka jylla bad phi ïohi hi kumno ka jylla ka la troiñ ha kine ki 7-8 snem. Nga ngeit skhem ruh ba lada ngi ïai bteng kumne ngin sa ïohi ïa ka lawei ba dum ha kane ka jylla” ong biang u ma Pala.
U la ther tyngeh ruh ïa kane ka sorkar kaba la pheil ban bteng ka jingkren ïasuk bad ka seng HNLC. “ Ka sorkar ka la pheil namar ka seng HNLC ka la wan sha ka miej jingïakren hynrei ka dei ka sorkar kaba pyntud bad ka paw shai ruh ba kam shim khia hi ruh ïa ka kam” ong biang une u nongïalam jongka Congress.
U la ong ba kane ka sorkar ka la pheil lut nadong shadong “ Ki la pheil ha ka khaïi pateng, ka ïoh ka kot bad mynta sa ka shongsuk shongsaiñ “ ong u ma Pala.
U ma Pala u la ong ba kane ka sorkar ka jop tang kawei kata ka long ban shim ram ban pynriewspah ïa ki katto katne ngut.
“ Ngam tip ha kano ka bynta ka sorkar ka la kheit ïa u soh jongka jingjop lait noh na kane kaba shim ram da ki phew phew hajar klur bad ka jingkylli shano ki pyntrei ïa kane ka ram. Ki la shim ram na ka Asian Development Bank, World Bank bad shaei ki pyntrei ïa kata ka pisa ym don ba tip. Ki pyntreikam ha surok namar ki dei ma ki hi ki kontraktor, ki myntri sorkar bad ki nongshim ram ruh. Kumta kane ka dei tang ka jingmyntoi ki katto katne ngut ym dei ka jingmyntoi jong kiba bun ba lang” pynkut u ma Pala.