Nongpoh, Nailur 06: Ka Khasi Student Union, Nongpoh Circle ha ka sngi Balang ka la ïa kynduh ïa ka Medical Superintendent jong ka Civil Hospital Nongpoh, halor ka nongrim ba ha kane ka jaka ai jingsumar ki nongpang ki shem jingeh tang lada lip ka bording ilektrik, namarba kum ki bor pynïaid jong ka jaka ai jingsumar kim lah satia wat ban pynbiang ïa u Generator ha ka por ba la lip ka bording ilektrik.
Ka jingleit ïa kynduh ïa ki bor pynïaid ka Civil Hospital Nongpoh ka dei hadien ba ki la ïoh pdiang ki jingujor na ki paidbah kiba la pynpaw ka jingsngewkhia halor ka jinglip bording ha ka jaka ai jingsumar, namar tang shu lip bording ha Nongpoh ki nongpang ki hap ban shong hapdeng ka jingdum ba kum ki bor pynïaid katei ka jaka ai jingsumar kim lah ban pynbiang ïa u Generator.
Hadien kane ka jingïakynduh ïa ka Medical Superintendnet ba la lamkhmat da President ka KSU Nongpoh Circle u Samla Johh Lyngdoh, u la ong ba ka seng ka dap da ka mynsiem ba sngewkhia halor ki jingduna ha Civil Hospital Nongpoh, namar ha ka jingïakynduh ïa ka Medical Superintendent la ïoh jingtip ruh ba kane ka jaka ai jingsumar ka don hapdeng shibun ki jingduna.
U la ong ruh ha ka jingshisha ka seng ka la ïa kynduh ïa ka Medical Superintendent tang ban wad jingtip halor ka jingud ki paidbah ba tang shu lip bording ilektrik, ki nongpang ba wan sumar ki hap ban shong ha ka jingdum hynrei phewse nalor ka jingeh ki nongpang ha ka por ba lip ka bording ilektrik ki don ruh shibun ki jingduna ha katei ka jaka ai jingsumar ba kum ki bor pynïaid ki kyndh jingeh na ka daw ba ka sorkar kam lah ban pynbiang kumba donkam ha katei ka jaka ai jingsumar.
U la ïathuh ruh ha kaba ïadei bad ka Generator la ïoh jingtip ba kim lah ban pyntreikam ha ka por ba lip ka bording ilektrik bad ka daw ka long ba ka don ka jingthud ha ka Generator bad khamtam la hap ban thied ïa ka petrol kaba ktah shibun ki jinglut ba kam don ka jingpynmang pisa na ka sorkar.
Ha kane ka jingïakynduh, la ïoh jingtip ruh ba ki don kiwei kiwei ki jingduna naduh ka jingduna ki Doctor bad kiwei kiwei ki jingduna kum ki Quarter ban sah ki Doctor bad kynthup ruh ka jingkyrduh ïa ka umbam ka umdih ba kum ki bor pynïaid ki shem jingeh ban pynïaid ïa katei ka jaka ai jingsumar, ong u Samla John Lyngdoh.
Ka seng ka la dawa ïa ka Sorkar Jylla ban pynbiang ïa kitei ki jingduna kiba don ha ka Civil Hospital Nongpoh.
