Shillong, Nailur, 06: Ka Khun Hynñiewtrep National Awakening Movement (KHNAM) ka la kynnoh ba ka Sorkar Jylla ka la pyndonkam bakla ïa ka 171 Indian Penal Code (IPC) tang ban pynkbum ïa ki Hynñiewtrep bad ong ruh ba ka jingkhot hajir ba dang shen ïa u President ka Hynñiewtrep Integrated Territorial Organisation (HITO) u Bah Donbok Dkhar halor ka jingpyndonkam ïa ka Uniform rong iong, ka dei ka jingleh donbor jong ka Sorkar.
“Hynrei ka HITO ka khlem phong ïa ki jaiñ iong da ka jingthmu ban thok lane ïalam bakla ïa ki paidbah lane ïa ka Sorkar bad katkum kaba ngi la ïohi ha ki Social Media la ar snem mynta ngim tharai ba ka HITO ka phong ïa ki jaiñ kiba ïasyriem bad ki jaiñ ba phong ki briew Sorkar haba ngi peit ïa ki Batch lane kino kino ki dak jong ka sopti ka HITO ka phong. Namarkata ngi ïohi ba ka Sorkar ka la pyndonkambakla ïa ka IPC 171 tang ban pynkbum ïa kiba kren namar ki Hynñiewtrep bad ka dei ka jingleh donbor jong ka Sorkar,” ong u kyrwoh ba la phah da ka KHNAM lyngba u Vice President u Bah Thomas Passah.
“Ka sorkar kam pat lap lane shem lane khlem pat don kano kano ka jingujor ba ka HITO ka la leh ïa ka kam be-aiñ namarkata ka jingpynngat ha ka IPC 34 ruh ka long kaba bakla,” la ong u kyrwoh.
“Haba ngi peit ïa ki jaiñ iong ba phong da ka HITO ngim ïohi ba ki long kum ki Uniform Pulit namar khlem don ïa ki Batch lane ki dak ki shin ha ka sopti kaba ïa syriem bad ki Uniform Pulit namarkata ka jingshah pynngah jong ka HITO ha ka Section 105 jong ka Meghalaya Police Act 2010 ruh ka long kaba bakla,” ong shuh shuh u Kyrwoh.
Haba kynthoh halor ka jingjia ba dang shen, ka KHNAM ka la ong, “lada phai sha ka jingjia ha ka 4 tarik, Nailur, 23, ka long kaba sngewsih ba ki bor jong ka aiñ kim pyrkhat shuh ïa ki paidbah kiba ïaid lynti, kiba ñiah kali ki bym bna eiei ruh. Shano ka jingkitkhlieh jong ki bor Pulit kiba dei ban ïada ïa ki paidbah bad wanrah ïa ka shongsuk shongsaiñ. Katkum ki Video kaba la paw ka jingleh baheh, ka jingtim sih jong ki Pulit ha ka 4tarik, Nailur, 2023 ym i kop ba ki dei ki briew jong ka aiñ bad la sngewdei ban ong ba dei ban pynngat ïa kine ki Pulit ha ka IPC 171 namar ki shu phong ïa ka Uniform Pulit hynrei ki treikam beaiñ ban pyntieng bad pynsmiej ïa ki paidbah.”
“Naduh ka 7 tarik, Rymphang, 2011 la pynbna ïa ka Meghalaya Police Act, 2010 bad ka Section 73 (2) Chapter XII, ka batai ba ka Sorkar Jylla hapoh lai bnai na ka jingtreikam jong kane ka aiñ ka dei ban shna ïa ka “Police Accountability Commission” ka ban peit ïa ki jingujor jong ki paidbah halor ka jingleh donbor jong ki Pulit. Ka jingkylli kaba mih ka long ba naduh u snem 2011 balei ka Sorkar Meghalaya ka khlem shym la thung lane pynbna ïa kane ka Commission. Hato kane kam dei ka jingailad jong ka Sorkar lane kiba bat ïa ka Sorkar hi ban leh katba mon? Lada peit katkum kane ka Meghalaya Police Act 2010 ka dei ka Sorkar kaba pynkheiñ kyndon da kaba khlem thung ïa ka Police Accountability Commission katkum ka jingbthah jong ka Section 73(2) jong kane ka aiñ,”la kynthoh ka KHNAM.
“Ka hok ban pyrshah ban buh jingkylli paidbah bad ban pynbor ïa ka Sorkar ban jubab ka dei ka Fundamental Political Rights jong ki paidbah kaba wan beit na ka Article 19 jong ka Riti Synshar ka Ri India bad kano kano ka sorkar kam lah ban shu pyndonkam da ki bor Pulit ban knieh noh ïa kane ka hok,” ong u kyrwoh.
“Ka jingmlieh jong ki Pulit ban shu kgawan Tear Gas lada dei ïa ki nonghikai ne ïa ki sengbhalang ka long kaba ngi hap ban pynrem bad ka pynpaw ïa ka jingbymlah jong ki bor Pulit ban treikam ha ka lynti jong ka aiñ. Ka Secretariat ka dei ka jaka paidbah bad ka jingpynjari ïa ka Section 144 CrPC ha kane ka thaiñ ka long ka jingleh donbor, lada ki Party kiba synshar ki tieng ïoh wan ki paidbah ban hylla bad dawa ïa la ka hok ha Secretariat kan bha ïa ki ban ym ïakhun elekshon hi ruh hynrei ai kin peit ïa la ka jong ka iing ka sem,” kynthoh ka KHNAM.
