Lap ka JNC bun ki nongtrei bar jylla kiba trei ha Amrit Cement EJH kim biang kot biang sla

Khliehriat iaiong 02: Kumba kawei na ki mat jong ka Save Jaiñtia Mission kaba lyngba ka tnat Employment Commission jong ka Jaiñtia National Council kaba hapoh ka jingïalam u Chairman ka Commission u bah Ency Shadap bad u Secretary ka Commission u bah Mebanteilang Sukhlaiñ ha ryngkat ka jing synran lang ki nongïalam ka JNC-CEC ba lam khmat da u General Secretary u bah Wanshwa Suting mynta ka sngi ka la leit ban khynra ïa ki kot ki sla ba kynthup ki labour license jong ki nongtrei bar jylla kiba trei ha Amrit Cement Mynkre East Jaiñtia Hills District bad hadien ka jing khynra ki la lap ba ki don bun bha ki nongtrei bar jylla ki ba la wan trei hapoh katei ka company khlem don ki kot ki sla kiba biang ha kaba na la liang ka seng mardor hi ka la pynpai ïa ki bad khlem shah shuh ïa ki ban trei.
Ki nongïalam jing ka JNC kiba ïakhun halor ki mat jingdawa jong ka Save Jaiñtia Mission, ki la ong ba kin nym shong kli kti bad kin nang ïai bteng ïa kane ka jing khynra sa sha kiwei kiwei ki karkhana dewbilat ruh kiba don hapoh East Jaiñtia Hills District.
Shuh, shuh la lap ruh ba wat ki bar jylla baroh kiba shong dukan hapoh u pud u sam katei ka company ki la khang lut ïa ki dukan tang shu poi ki dkhot ka seng bad kane ka la pyn suba jur ba imat ki dei kiba la shu wan trei beaiñ bad wan khaïi beaiñ khlem pat biang ki kot ki sla.
Haba kren sha ki pathai khubor, u General Secretary jong ka JNC-CEC, u bah Wanshwa Suting, u la ong “Ïa kine ki bar jylla ki bym don ki kot ki sla kiba biang kiba la wan trei ha kane ka company Amrit Cement, ngi la rai ba ngin pynphai shwa ïa ki sha ki jaka ba ki shong ki sah, namar kane ka jingleh jong ngi ka long ruh kum shibynta ban pynsngew sha ka sorkar ïa kawei na ki mat kaba don hapoh ka Save Jaiñtia Mission ba ka seng ka dawa bad kata ka long ba ka sorkar ka dei ban shna noh da ka Policy thungkam hapoh ki company bapher bapher kiba don hapoh East Jaiñtia Hills District, namar ngi la iohi ba ki don bun ki company kiba la wan shane bad ngi iohi ba ki don bun pynban da ki bar jylla kiba ngim lah ban tip ioh ki dei pynban ki bar ri ruh namar ngi la lap ba kim don ki kot ki sla kiba biang bad ki la wan trei shane, katba ki khun samla jong ngi pat ki don hapdeng ka jingeh namar ka jingkyrduh kam wat lada ki la pyndep ïa ki kyrdan jingpule bapher bapher ruh hynrei ki shu shong khlem kam”
U la ong ruh ba ha ka jingshisha ki company la dei ban pyrkhat lem ha ka thung kam thung jam namar ki la pyndonkam lut ïa ki mar poh khyndew ruh kiba don ha ka thaiñ hynrei ym don pat kano kano ka jingmyntoi ïa ki trai ri, trai muluk “kumta ka JNC ka la i donkam ba ka sorkar ka dei ban shna noh da ka Policy thungkam lane ka State Employment Act khnang ba kan long ka jingmyntoi ïa ki samla wad kam bad ban buh ruh 80-90 percent ban thungkam ïa ki trai jylla” la bynrap u bah Wanshwa Suting.
Kum ban shu pynkynmaw ba ïa kane ka Save Jaiñtia Mission, ka JNC ka la thaw ha ka 14 tarik u bnai nohprah 2024 kaba don san tylli ki mat jingdawa ba ka Mission ka la buh hakhmat ka sorkar kaba na ka bynta ka jingbit jingbiang ki paidbah ka ri lum Jaiñtia bad ki nongshongshnong jong kanjylla hi barohkawei.
Ki san tylli ki mat jingdawa kiba hapoh ka Save Jaiñtia Mission ki long ban pynkhlaiñ ïa ka JHADC, ban dawa pynrung ïa ka ktien Jaiñtia ha ka State Language Act jong ka jylla bad ban pynrung ruh ha ka jingrwai Meghalaya Anthem, ban pynshna noh ïa ka policy thymmai ne ka rukom thungkam thung jam ha ki kharkhana dew bilat, ban pynbeit noh ïa u pud u sam hapdeng ka Jaiñtia Hills bad ka Assam da kaba pynshong nongrim ïa ka PRE 1951 Jaiñtia Hills Map bad kaba khatduh ka long ka jingdawa ban pynshna noh ïa ka small scale coal mining policy”
Hapoh kane ka mission ruh ka seng kala dep ban thaw ïa kawei ka tnat treikam jong ka kaba la tip kum ka Employment Commission ka ban peitngor ïa ka rukom thungkam thungjam jong ki company ne ki kharkhana dew bilat kiba don ha baroh kawei ka ri lum Jaiñtia khnang ba ka rukom thungkam Kan ym long kaba noh shiliang.