Shillong, ïaïong, 02: Ha sien kaba lai ba la pynlong ïa ka ASEAN-India Artists’ Camp ha nongbah Shillong la ïashim bynta da ki barikor na ki ri ka dewbah Asia, kynthup na ka ri India.
Na ka thaiñ Shatei Lammihngi la mihkhmat da u Bah Raphael Warjri bad u Chandan Bez Barua.
U kongsan ha kane ka rong ka taw thohdur u la long u Myntri Khynnah ka Sorkar Pdeng uba khmih ïa ka tnat External Affairs u Pabitra Margherita bad kiwei kiwei ki kynrem lyndan ki la ïa don lang ban sakhi.
La jied ïa ka nongbah Shillong namarba ka don ïa ka jingithiang jong ka mairang bad ki saw aïom ba pyngad.
Baroh laiphewsaw ngut ki barikor kiba la ïashim bynta ki ong na ka ki Singapore, Thailand, Timor-Leste, Malaysia, Indonesia, Vietnam, Brunei Darussalam, Cambodia, bad Philippines kynthup ruh arphewlai ngut na India. ïa ka ASEAN-India Artists’ Camp 2025 la pynbeit da ka seng Mattithaw SEHER ba la ai jingkyrshan da ka Ministry of External Affairs ka Sorkar India.
La pynlong ïa kane ka rong ka taw thohdur halor ka phang jong ka khanatang Hindu, ‘Ramayana’ da kaba kdew ïa ki snap jong ka longbriew manbriew, khlem da pyni ïa ka jingngeit niam Hindu.
Ka puron durim ba pawnsm ka Deepti Naval ka la shimbynta lang kum ka barikor ha ryngkat laingut ki akhia barikor ba rangbah.
U barikor Chandan Bez Barua na Assam u la thohdur da ka riti khanatang na ki Karbi, bad u Bah Raphael Warjri u la thohdur halor ka Pahsyntiew da ka buh ki syrtap jingmut ba syriem ïa ka Sita kum ki longkmie ba leitphai sha ka ramew shiryta ha kaba kut ka jingim ha pyrthei.
Ka pyninam ïa ki dur thoh kan bteng haduh ka 7tarik mynta u bnai ha Tripura Castle, Shillong.
