Ïoh GI Tag ki jaiñ Ryndia ba thaiñ ha Meghalaya, ki jingmyntoi ïa ki nongthaiñ jaiñ

Shillong, ïaïong, 02: Ki jaiñ Ryndia ba la thaiñ bad pynmih da ka jylla Meghalaya ki la jam sha uwei pat u mawmer kynthup ruh ïa ka tnat Textile ka Sorkar Jylla, namarba ki jaiñ Ryndia ki la ïoh ïa ka jingbuh kyrteng Geographical Indication (GI) na ka bynta ka jingthaiñ da ki kti, ka jingthir ksai da ki kti, ka jingwieh rong ba la ïoh na ka mariang, ka jingpynmih hi na lade.
Ka Ryndia ryngkat bad ka Meghalaya Handloom Products ba la pynbna da ka GI Authority, Registrar Geographical Indications, Geographical Indications Registry, Intellectual Property Office, ka Sorkar India la pynrung hadien ba la rejistar kum ka G.I ha ka official website jong ka G.I Authority.
Ka tnat Textiles ka Sorkar Meghalaya ka la pynskhem bad shimkhia ïa ka jingtreikam da ka jingkyrshan jong ka NABARD bad ka jingïarap jong u Dr Rajnikant bad la pynshlur bad ai jingkyrshan da tnat Textiles bad ka Meghalaya Ryndia Producers Association palat saw snem kynthih. Ha ka jingïaid lynti ba la sdang da ka tnat Textiles, mar mar ka la ïoh jingithuh bad la pynbna ïa ka shnong Umden – Diwon kum ka shnong Eri Silk ba nyngkong eh ha ka jylla ha ka 12 tarik, Rymphang, 2021.
U Principal Secretary jong ka tnat Textiles Bah Frederick Roy Kharkongor bad ka kynhun na ka tnat Textiles, ki dkhot ka Meghalaya Ryndia Producers Association bad ki nongthaiñ jaiñ na ka shnong Umden-Diwon ki la ai jingkyrshan ïa ka GI application bad ïa ka jingïasyllok ba khatduh la pynlong ha ka jingïalang jong ka Consultative GI Group ba la pynlong da ka ophis Geographical Indications Registry, Sorkar India kaba la long ha Kolkata ha ka 20 tarik, Naiwieng, 2024.
Kine ki jingtrei shitom baroh ki dei ki jingai jingkyrshan jong u Myntri Rangbah ka jylla u Conrad Sangma bad u Myntri ka tnat Textiles Bah Paul Lyngdoh kiba angnud ban pynpaw pyrthei ïa ki mar bad ki tiar ba la pynmih na ka jylla Meghalaya khamtam eh ka jaiñ Ryndia.
Kum ban shu kdew hangne, ba u shynrai Lakadong bad ki khiew ranei ba la shna ha ka shnong Larnai na ka West Jaiñtia Hills ki dei kiba la ïoh ïa ka jingithuh bad ka jingbuh kyrteng Geographical Indication (GI).