Shillong, Iaiong 2 : Da kaba burom sha baroh lang kumjuh halor ka phang ïa kaba na ka liang jongka kynhun Awaken India Movement (AIM) kumba la ïeng ban synran lang halor ka rynsan jongki paidbah Nongshong shnong ba pura jongka Jylla Meghalaya da kaba la shimti ïa ka rai ban pynlong ïa ka jingïalang paidbah (Public Demonstration) hapoh Barik Point, Shillong ha ka 7 tarik jong u Bnai ïaiong (April) 2025 halor ka jingshah pynbor jong kiba bun ki paidbah ki bym pat pdiang ïa u Aadhaar ban leh jubor la ka long ha Sor ne Nongkyndong bad hadien ba la ïoh jingtip ba ha katei ka sngi ka long ka sngi shuti hapoh ka Jylla namar ba kan don ka Shad Suk Mynsiem jongka Seng Khasi Mawkhar ka ban long hapoh
Weikieng naduh kapor mynstep bad na ka liang jongka kynhun ka la hap ban pynkynriah noh shuwa katto katne sngi da kaba yn wanrah ban pynlong noh ha ka 9 tarik jong u juh u bnai Iaiong naduh ka por 10 baje mynstep ter ter ha kajuh ka jaka kumba la kdew haneng. Kane ka long kat kum ka kyrwoh ba la pyllait paidbah da u Bah Banshai Marbaniang Chairman Awaken India Movement (AIM) Meghalaya State Council
Ki paidbah jongka Ri ki bym pdiang ïa u Aadhaar naduh ki Rangbah ki Longkmie, ki Khun Samla kynthei bad shynrang lem haduh ki Khyllung Khynnah kiba dei ban ïeng shakri namar ka lawei ha la kajong ka Ri katkum ka hok bad jingshisha ki dei ban mih paidbah ha katei ka sngi ban ïeng tylli lang kawei ban pyrshah halor ka jingshah pynbor ban pyndonkam khlem da pdiang ïa u Aadhaar.
Hapdeng jong baroh kiba sngewthuh bad shemphang halor ka hok kum ki Nongshong Shnong ba pura kumba la ïohi ha ki jingjia ba dang shen kumba la shah ban beiñ da jingshah kheiñ mraw kum ki Trai Ri hala ka jong ka Jylla tang namar bym treh ban pyndonkam ïa u Aadhaar. Ka AIM kaba long kum ka National Federation hapoh ka Ri India ka ïeng halor ka hok katkum ka Riti Synshar Paidbah jongka Ri India ban pyrshah ïa ka jingbthah jong u Aadhaar ban pynduh jingïarap na ka bynta ki skhim paidbah ne wat ban shah pynduh bam ha ki skul na bynta ki khyllung khynnah bad kiwei kiwei baroh.
Kane ka jingïakhih ka long kaba kynthup ïa ki jingïalang paidbah, ki jingkren bad ban pynsngewthuh shaphang kane ka mat kaba long ka bynta kaba bha. Na ka liang jongka kynhun katkum ka bynta ba la pynpaw ka long ban ïeng pyrshah halor ka jingshah pynbor ki Paidbah jongka Jylla ban leh Aadhaar da kaba sakhi halor ka jingshah pynduh jingïarap kum ki trai ri trai muluk kiba im hapoh ka Jylla khamtam halor ki Longïing kiba duk ba kyrduh kiba la iam pait dohnud halor ka jingbym ïoh shuh ban pdiang ïa ka Rashon Sorkar bad kiwei kiwei tang namar ka daw ba kim pdiang ïa u Aadhaar. Ki Nongtreikam Sorkar kum ki Anganwadi, ASHA bad kiwei kiwei ki la mad da kaba shah weng noh na ki kam jongki kumba ki trei tang naka daw ka jingbym pdiang ïa u Aadhaar. Ki khynnah skul ruh kumjuh kila shah weng noh napoh ka skul ba ki leit ban pule bad ban duh noh ban leit skul kylleng kylleng ha kaba kim ioh lad shuh hapoh ka Jylla Meghalaya naka daw ba kim pdiang ïa u Aadhaar. Kane baroh ka la paw shai kumba la sakhi pura da kaba wan jia haduh ban shah pynbor khlem da niewkor shuh ïa ka hok bad jingshisha jongki paidbah Nongshong shnong ba pura jongka Jylla kumjuh hapoh ka Ri India baroh kawei.
Ki Nongmihkhmat kiba la leit ban mihkhmat ban long kum ki MP, MLA bad MDC ngi sakhi ba kinlong ki shakri jong u Paidbah, hynrei kumba ngi ïohi halor kine ki sngi kiba mynta lyngba ki kyndon bapher bapher halor ka jingtreikam ka jongki ne khamtam haba phai halor ka Riti Synshar Paidbah jongka Ri India ki khlem da kheiñkor shuh ïa kane baroh bad ban pynpaw khamtam haba ngi kren na bynta la
ka jong ka Jylla kum ki paidbah ki khlem da ïohi eiei ruh em ïa ki Nongmihkhmat ba kin pynpaw ban synran ban ïada ïa ka jingeh jongki paidbah khamtam haba phai halor kane ka mat kaba kongsan halor ka jingshah pynbor ki paidbah ban leh Aadhaar haduh mynta jongkine ki sngi. Naduh kaba sdang haduh kat mynta ym pat sakhi ba kan long ka jingshai sha ki paidbah kiba long ki Nongkyrshan ïa ki Nongmihkhmat kiba la phah ban leit mih shapoh Lok Sabha, Assembly lane Autonomous District Council ba kin kren ne pynpaw eiei halor ka mat jong u Aadhaar.
Kumta haba phai halor kine ki sngi kiba mynta katkum kipor ba wan ka jingshah pynbor bad shah ban beiñ ïa la ka hok bad jingshisha kum ki briew kiba im ha sla pyrthei da kaba phah ban shimti ïa u Aadhaar bad ban shah byrngem shai ba lada ym don Aadhaar ka mut ki paidbah ki la shah pynduh
jingïarap ha baroh ki liang bad kane baroh ka la paw tyngkreiñ haduh ban shah kheiñ ïa ki paidbah ba ki la long noh ki nongwei ha la ka jong ka Ri bad ka Jaidbynriew kumba don hapoh ka Jylla ne wat hapoh ka Ri India ruh kumjuh.
Ka jingïakhih paidbah hapoh ka Jylla Meghalaya kaba long hapoh ka Ri India ka long ban ïeng skhem katkum ka hok da jingpynpaw ba kum ki nongshong shnong ba pura ki pyndonkam ïa ki hok katkum ka Riti Synshar jongka Ri India, khamtam eh ha ka ban pyrshah ïa ki polisi treikam Sorkar kiba wanrah da kaba pyrshnag ban pynduh ïa ka hok longtrai jongki paidbah. Haba phai katkum ka khyrnit (Article) 19 jong ka Riti Synshar ka Ri India, kaba ai jingkular ïa ki paidbah ka Ri da jinglaitluid ban kren bad pynpaw pyrthei halor ka hok ban ïalum lang da kaba suk khlem ki tiar ïaleh. Ki kyndon ki ai ka bor ïa ki nongshong shnong ban pynpaw ïa ka jingpyrshah bad ban pynkhih pyrshah ïa ki kam sorkar kiba shem ba kim long kiba hok ne kiba pynmynsaw.
Ka ïing Bishar lyngba ka Supreme Court ba don burom jong ka Ri India ka la ban jur ïa ki bor Sorkar kiba bun halor ka hok jongki Paidbah ka Ri India ba kum ki nongshong shnong ki don ka hok katkum ka Riti Synshar paidbah ban pyrshah ïa ki polisi sorkar, kane ka hok ka hap hapoh ki katto katne ki kyndon aiñ kiba thmu ban pynneh ïa ka shongsuk shongsaiñ bad ka jingshngaiñ jong ki paidbah ha la ka jong ka Ri bad ban sakhi haba ki ïeng kum ki paidbah ban mih ban ïakhih ka dei ban long kaba donkam na ka bynta ka synshar paidbah kaba dei ban treikam da kaba burom bad pynshlur halor ka hok bad jingshisha khlem da pyndam ïa kano kano ka bynta kaba bha halor jongki paidbah kiba im halor ka Ri India kaba laitluid. Kumjuh lyngba ka ïing Bishar ka Supreme Court badon burom ka la pdiang ïa kine ki mat baroh katkum ka hok da kaba rai ba watla lah ban pyndonkam ïa u Aadhaar na
ka bynta ki katto katne ki mat, hynrei ym dei ban long da kaba donkam kum ka bynta kaba kongsan na ka bynta ban ïoh ïa ki jingshakri kaba pura. Ka ïingbishar badon burom ka la ban jur ruh ba ki lad ki lynti ban pynshisha ïa ka jinglong briew kum ki Nongshong Shnong ba pura ka Ri ki dei ban don na ka bynta kito ki bym lah ban pdiang ïa u Aadhaar.
Ha ka jingpynkut, ka jingpynbor jong ka sorkar ban pyndonkam ïa u Aadhaar na ka bynta ki paidbah kiba im hapoh ka Ri India ne kumjuh haba phai katkum ka jingshakri BPL ïa ki paidbah kiba duk kam long kaba wanrah jingeh ne wat ban pynjynjar tang ïa ka jinglah ban ïoh ïa ki paidbah kiba rit paid hynrei ka buh ïa ki jingkylli kiba khia ha ka akor bad ka aiñ shaphang ka jingïada ïa ki hok longbriew
manbriew ba kongsan hapoh ka Jylla bad khamtam hapoh ka Ri India la ka long ne em kaba pura katkum ka hok bad jingashisha.
