Nongstoiñ, Ïaïong 02 : U snem 2025 u dei u snem u ba ka jingthang pathar ïa ki khlaw ki btap ha West Khasi Hills ka jur palat haba ïa nujor ban ki snem ba la leit noh baroh, ha kaba da ki phew lak ki dieng ba dang rit ba kynthup ïa ki dieng kseh bad dieng met, ki la julor lut bad bun tylli ki ïing shong briew ha kylleng ki shnong ha West Khasi Hills, ki la shu lait salit na ka jingbam duh ka thylliej ding kaba pur na ki jaka ba ki riew shim kabu ki thang dusmon.
Ka jingthang pathar ïa ki khlaw ki btap, ki lum bad ki law bnïap ka pynsngewsih haduh katta katta ïa ki trai jong kitei ki jaka bad wanrah ruh ïa ka jingma, namar ha ki aïom ba pyrthei ka mariang ka la ryngkhiang bha, ka thylliej ding ka lah ban pur sha ki shnong ki thaw bad ki ïing ki sem ki la ban ing khamtam eh ha ki nongkyndong namar ba naduh u bnai Nohprah haduh u bnai Jymmang.
Kiba bun ki nongshong shnong ha ki jaka kyndong kim ju don ha shnong, hynrei ki don ha ki jaka ba ki leit trei leit ktah bad leit bylla katba ha shnong pat ki lah ban don tang ka kmie bad ki khun rit.
Nalor kata ka jingthang pathar ïa ki lum bad ki khlaw, ka dei ka daw kaba pynduh jait ïa ki jingthung ba lai phew jait kiba long ki dawai ba kongsan ban pyndonkam ha kaba pynkoit ïa ki jingpang jingshitom jong ki nongshong shnong.
Ka jingthang pathar ka pynduh jait ruh ïa ki puit ki khñiang bad ki jingthaw ba rit kum bad kiwei kiwei. Ha kajuh ka por ka jingthang pathar ïa ki khlaw ka ktah haduh katta katta ïa ka mariang bad ïa ka jingitynnad jong ka.
Haba phai ha katei ka bynta ka la don kam ïa ki Nongsynshar shnong bad Hima ba kin pynsngewthuh ïa ki paitbah bad ban thaw da ki aiñ ba pyrkhing bha ban pynshitom ïa kiba mlien ïa katei ka kam.
Ha kine ki sngi haba ïaid kylleng ki jaka ka West Khasi Hills la lap ba ki lum kiba itynnad ki la kylla rong iong bad kylla bthuh, ki dieng ba jyrngam kiba dang rit ki ïap lut khoit, ki um ki wah ki la nang rit katba nang mih ki snem hynrei ym don satia kiba sngewthuh ba ka jingma ka ba khraw ka ap ïa ka pateng jong ki khun ki ksiew.
Haba pyrshang ban twad jingmut na ki paitbah nongshong shnong halor katei ka jingwiang ding pathar ïa ki lum bad ki khlaw, ha kaba bun bah ki nongshong shnong ki kubur ba kam long kaba bha ban wiang ding pathar, don pat kiba ong ba ka jingwiang ding ka dei namar ba ki kwah ba u phlang lung un mih kloi ban ïoh bam ki jingri kum ki masi ki blang.
Kumta na ka bynta ban pynsgewthuh ïa ki pait bah nong shnong shnong la don kam ban ai jinnghikai man la ka por khnang ba kin sngewthuh bad ban khot ruh ïa ki briew ka aiñ ba kin pynshai bad pynsngewthuh ba kino kino kiba mlien ban wiang ding pathar kin ngat ha ka jingpynshitom.
Nalor kata ka la donkam ruh ba ki stad mariang kin shimkhia ban leit pynshai sha ki paitbah shaphang ka jingmyntoi ba ki ïoh lada ki pynneh pynsah ïa ka mariang bad ki khlaw ki btap.
