Shillong, Iaiong 2 : U Nongïalam ka BJP bad Myntri Sorkar Bah A.L. Hek ha ka sngi Balang ula ong ba “Kawei ka Ri, Kawei ka Elekshon” ka dei ka policy kaba biang palat.
Kat kum ka jingong jong u, ka jingtyrwa ban pynlong ha kajuh ka por ïa ka elekshon jong ka Lok Sabha bad Assembly Elekshon kan ïarap bha ban pynduna ïa ka jinglut jingsep ïa kine ki elekshon.
“Kawei ka Ri, Kawei ka Elekshon ka dei ka Policy kaba biang palat. Kane ka dei ka jingsngew jong nga shimet” ong u Bah Hek haba ïakren bad ki nongthoh khubor.
“Mynta, ngi don shibun tylli ki elekshon ha ka shisnem. Ha man ki elekshon kin pyntreikam ïa ka model code of conduct. Lada ka model code of conduct ka treikam, kan pyndkoh ïa ka jingïaid kiba bun ki kam pynroi. Kumta ka jingdon bun ki elekshon kan lam sha ka jingtreikam ba bun sngi ki model code of conduct bad ka jinglut jingsep ruh kan bun bha. Mano ban dei kiba duhnong, ki dei ki paidbah jong kane ka Ri” ula batai.
Haba kylli, u Bah Hek ula ong “Ngam ju don jingkhuslai lada nga jop ne nga rem ïa ka elekshon hynrei kaei kaba nga sngewkhia ka long ïa ka roi ka par jong ka Jylla bad kumno ban pynduna ïa ki jingpynlut ki bym da donkam jong ka Ri bad ka Jylla Meghalaya”.
La ka BJP kan ïakhun ïa ka elekshon Garo Hills Autonomous District Council (GHADC) ka ban long ha u snem ban wan, une u Nongïalam ka BJP ula ong ba ka party jong u ka dei ka party ka bym treikam satia tang ha ka por elekshon.
“Ka BJP kala treikam khlem shongthait la ka don elekshon ne ym don elekshon bad ka trei 24 kynta shisngi na ka bynta ki paidbah” ula ong.
“Ngim ju pynlong jingïalang tang hashuwa ka elekshon. Kaei ka jingmut ban dei ka seng saiñ pyrthei lada ngim mih ïakhun ïa ka elekshon” ula ong.
