Pynshai u President JNC, JSU sha ki paidbah nongrep bad sha ki para dkhot hadien ka jingïakren

Khliehriat jymmang 20: Hadien ka jingiakren ki nongialam ka JNC bad JSU lem bad u Deputy Commissioner, ki majistor bad ki heh pulit lem bad ki nongrep kaba kaba la shimpor la jan shi kynta hapoh conference hall ha ophis u DC ha Khliehriat, U President ka Jaiñtia National Council, u bah Sambormi Lyngdoh, u General Secretary ka JSU, bah Niel Mukhin ki la pynshai sha ki paidbah kiba ap ha bar.
U bah Sambormi u la ong ba u DC un ai ka rai lashai ka sngi hapoh 12 baje mynsngi bad u la pynshai ïa kaei kaba la iakren bad ki bor district ha kaba iadei bad ka jingdawa ban pynsangeh noh mardor ïa ka public hearing jong ka company Shree Cement kaba yn pynlong ha ka 22 tarik mynta u bnai jymmang ha elaka Nongkhlieh.
Na ka liang ka JNC , ka JSU lem bad ki paidbah nongrep kin sa leit biang lashai ka sngi ha DC ophis ha Khliehriat ban iohsngew ïa kaei kaba ka sorkar ka shim rai.
U tei u nongialam ka JNC u la pynsgew ruh ïa kaba ong u Deputy Commissioner ha kaba u DC u la ong ba ïa kane ka kam ïa klumar jaka ka dei hapoh ka jingpeit ka JHADC bad ha kaba ïadei bad ka jingpynsangeh ïa ka public hearing u DC um pat ioh ktien eiei na ki bor ba halor bad tat haduh lashai ka sngi yn ioh jingtip ïa kane, u la kyntu ïa ki paidbah ban iaishah haduh lashai ka sngi bad ong ruh ba lada donkam ban ialeh da ka bor ruh hap ban ialeh ha kaba na ka liang ka seng ruh ka la long kaba la khreh ban ialeh da ka bor, u kyntu ïa ki paidbah ba kim dei ban ngop ha kino kino ki jingshah pynbiej hynrei ban iaineh ha ka nongrim.
“Wat lada ka public hearing kan iaid shakhmat na ka liang ka JNC, ka JSU bad ki paidbah ngin nym sangeh ïa ka jingiakhih, lada hap ban kyntait ban iashim bynta ha ka MP election ruh ngi hap ban kyntait, namar ka jingiakren jong ngi kan pynhun tat haduh ba kin da pynsangeh ïa ka public hearing, namar ngi sngewthuh ba lada kane ka company la ioh ban leh bor nangne shakhmat lei kan nang jur ka jingleh bor ynda ki la sngew long trai”
Kumjuh ruh na ka liang u Secretary jong ka Jaintia Students Union, u samla Niel Mukhim u la pynpaw bad ong ba ha ka por ba dang iaid ka jingiakren hapoh conference hall, u DC, Manish Kumar u la pyrshang ban kdat noh ïa ka phang iakren da kaba u la kren pynban shaphang ka Speed Corridor, shaphang ka kam dewiong bad kane ka la pynsngew lyngngoh ïa ki seng bad ong ruh ba kane ka jingleh u DC imat u kwah ban pynklet ïa ka mat ba iakren ba ïadei bad ka public hearing, u la ong ruh ka dei ka jingiakren kaba kyllaiñ bha namar ki bor district ki pyrshang ban kyllaiñ katba lah, na ka liang jong ngi ngim sngewhun,imat ki bor ba halor ki la pyrshang ban ong ïa u DC ba un kyllaiñ”
Kumjuh ruh na ka liang ki nongrep ruh ki la pynpaw ba kin ieng beit halor ka nongrim ba ki la dawa ban pynsangeh public hearing bad lada kane kam urlong kin khang ïa ka DC ophis.