8.40 lak ngut kiba pep skul shiteng por, ailad ka MBOSE ban ïakhun ïa ka eksamin SSLC

Shillong, Jymmang 20 : Namar ka jingjur ka jingieh noh shiteng por ïa ka jingpule, ka Meghalaya Board of School Education (MBOSE) ka la ailad bad khot aplikeshon na ki samla pule shimet ne Private Candidate jongka Secondary School Leaving Certificate (SSLC) Examination.
Katkum ki jingtip kiba la pyllait dang shen da ka UDISE, ka jylla ka la buh antad ba ki don kumba 8.40 lak ngut kiba la iehnoh shiteng por ïa ka jingpule ka jongki” la ong ka Board, “Da kaba pynpaw ïa ka jingdonkam kyrkieh ban pynïar ïa ka jingpule bad ka rukom pynlong ïa ki eksamin”.
“Ha kaba iadei bad kane ka bynta, ka kyndon na ka bynta ki Private Candidate ka long ka sienjam kaba kongsan ban shim ban pynthikna ba ka pule puthi kan long kaba ïoh bynta lang da baroh” la pynpaw ka MBOSE ha ka jingpynbna paidbah.
“Kane ka sienjam ka thmu ban pynkhlaiñ ïa ka jingai ïa ka pule puthi kaba salonsar da kaba ai ïa ka lad kaba ar ïa ki samla pule, kiba mad ïa ki jingeh shimet, ne na ki daw jong ka imlang sahlang bad ka ïoh ka kot” la ong ka Board.
“Kan plie lad ïa ki samla pule ba kin ïoh ban rung biang sha ka thup jong ka pule puthi bad ban pyndep ïa ka jingpule ka jongki ha ka kyrdan Secondary”.
Da kaba weng ïa ka jingeh, ka MBOSE ka la pynthikna ba kam don kano kano ka jingbuh kyndon ïa ka rta. “Ka board ka la pynshai shuh shuh ba kan ym don kano kano ka jingbuh kyndon ïa ka rta ïa ki Private Candidate ki ban ïaleh ïa ka eksamin SSLC, kumta kan plie lad ïa ki nongpule ha ki rta bapher bapher kiba don ïa ka jingangnud ban pyndep ïa ka jingpule ka jongki”.
ïa ki aplikeshon lah ban aiti ha ki Centre kiba don ha ki shnong ban pynsuk ïa ka kam ka jam. “Ki samla kiba don jingthmu ki lah ban aplai na ki Centre kiba don hajan eh, ban pynlong ïa kane ka jingthep ïa ka aplikeshon kaba plie ïa baroh bad kaba suk”.
Ka Board ka la kyntu ïa baroh kiba aplai ba ki dei ban khmih bniah bha ïa ki jingtip. “Ki samla pule kiba lah ban thep, la bthah ba ki dei ban pule bniah bha ïa ka jingpynbna paidbah, kynthup ïa ka bynta ne kyrdan kaba lah ban thep, ki kot ki sla kiba donkam, ka jingsiew bad ka rukom aiti ïa ki kot ki sla bad ban pyndep ïa ka aplikeshon ka jongki hapoh jong ka por kaba la buh”.
“Ka MBOSE ka ïengskhem ha ka jingkitkhlieh ban pynthikna ba ka dei ban long ryntih ha ka jingplie lad ïa baroh ha ka pule puthi bad ka ïengskhem ba ka jingai ïa ki sertiphiket ka long kaba plie lad bad kaba salonsar ïa baroh ki nongpule” kala bynrap.
Ka Board ka la kyntu ïa kiba don bynta lang ha ka kam, ki skul bad ki dkhot jong ki shnong ki thaw ba kin pynsaphriang sha kylleng ïa kane ka jingpynbna paidbah khnang ba bun bha kin ïoh ïa ki jingtip bad ba kin ïoh ban ïashim bynta.