Dawa ka WKHDVECA ban pynkhuid shwa ban sdang ka VBGRAMG skhim

Nongstoiñ, Jymmang 20: Ka West Khasi Hills District Village Employment Council Assocïation (WKHDVECA), ka la dawa na ka sorkar Jylla ba ka dei ban shimkhia ban pynkhuid noh shwa baroh ki pisa bad jinglut jingsep kaba dang sah jong ka skhim MGNREGA, ha shwa ban sdang pyntreikam ïa kaba thymmai kaba la tip kum ka VBGRAMG scheme ha West Khasi Hills District.
Haba kheiñ lang ïa ka jingsahkut jong ka pisa ba tang hapoh jong ka West Khasi Hills District kaba don ïa 5 tylli ki block office, kynthup lang ïa ki Block office kiba dang thymmai, ka la poi sha palat 23 klur tam haduh mynta.
Ka synjuk ha ka jingïalang bah ha ka 18 tarik mynta u bnai ha Nongstoiñ, ka la pynpaw ïa ka jingsngewkhia halor ka jingsahkut ki pisa pilaiñ jong ka skhim MGNREGA, kaba la wanrah shibun ki jingeh ïa ki Village Employment Councils, ki nongtrei bad kumta ter ter. Kiba bun hi ki pynpaw ba na ka bynta ka jingïaid beit ha kaba pyntrei thymmai ïa ka VBGRAMG, la dei ban pynkhuid noh shwa kloi lan ïa ki pisa ba dang sahkut baroh.
Na ka liang ka Synjuk ka WKHDVECA ka da ban jur ruh ba ka jingpyrshang ban pyntreikam ïa ka skhim thymmai, katba ki jinglut jinglah na ka bynta kaba rim ym pat lah ban pynkhuid, kan tynrong ki jingeh ba bun jait sha ki VEC bapher bapher jong ki block kiba don ha kylleng ka District.
Na ka liang u President Bah J.T.S.Thongni, u la ong ba kane ka jingpynsngew jong ka synjuk ka dei halor ka jingthmu ban wanrah ka jingïaid beit bad ryntih ha ki kam ki jam bad ki jingmyntoi jong ki Village Employment Councils, khnang ban ïashai bad ïakhuid noh baroh ki jinglut jingsep jong ka skhim MGNREGA kaba rim, shwa ban sdang noh pat sa ïa ka skhim VBGRAMG kaba thymmai.