Plie u Bah Pius Marweiñ ïa ki ar tylli ki ïing skul ba thymmai ha Mawjai bad Nongmluh

By Mawphor Editor On Apr 3, 2025

Mawkyrwat, Ïaïong 02 : Kum shibynta ban kyntiew bad ban pynbha shuh shuh ïa ka pule puthi hapoh jong ka South West Khasi Hills District, na ka liang ka tnad pule puthi jong ka sorkar Meghalaya ruh ka la leh ïa kaba bha tam la ka long ban pynbha ïa ki jingtei jong ki skul pule kiba ha ki jaka sor ne wat kiba don ha ki jaka ba kham kyndong ruh.
Kumta ban pyntyllun kham bha shuh shuh, mynta ka sngi ka 2 tarik u Ïaïong, 2025 u bah Pius Marweiñ uba dei u MLA bad MDC jong ka Ranikor Constituency kum u kongsan u la ïoh ban plie da kaba khap ïa u ribon jong ki ar tylli ki ïing skul ba la shna pynthymmai kata ka Mawjai Government Lower Primary School, Mawjai bad ka Nongmluh Government Lower Primary School kiba hapoh ka South West Khasi Hills District.
Lah ban kdew ba ïa Mawjai Government Lower Primary School, Mawjai la pyntrei ïa ka jingtei ha ka mang pisa kaba T. 44,79,488/- lak tyngka bad ka Nongmluh Government Lower Primary School la tei da ka jingmang pisa kaba T. 44,79,448/- lak tyngka kaba dei na ka School Infrastructure Upgradation Projects kaba hap ha ka Phase – II ba la synñiang pisa hi da ka Sorkar Meghalaya.
U bah Pius Marweiñ uba dei u MLA bad MDC jong ka Ranikor Constituency haba kren ha ka jingïalang u la ai ka jingïaroh na ka bynta ka sorkar kaba la long la kloi kumno ban pynwan dur ïa ka pule puthi ha ka rukom kaba dei da kaba ka ai ki lad jingïarap ban pynbha ïa ki ïing skul kiba la i donkam ban pynbha. “Da ka jingdon jong ki ïing skul kiba la jot la pra ka lah ban long kawei ka daw jong ka jinghiar ka pule puthi”, ong u bah Pius. Namarkata, lyngba ka jingïohi jngai jong ka sorkar lyngba ka tnad pule puthi ban pynbha ïa ki ïing skul ka la long da shisha ka jingïarap bad kyntiew pat ïa ka pule puthi ha ki dong ki thaiñ bad ki shnong hapoh jong ka Jylla Meghalaya.
U la ong ruh ba kum ka konstitwensi ka la long kaba donbok bha ha kaba naduh ka jingmang ha ka Phase – I haduh mynta ka Phase – III ki la don shibun ki skul hapoh ka Ranikor Constituency kiba la ïoh jingïarap. Ym tang kata u kyrmen ruh ba ha kine ki Phase ki ban dang wan ruh kyrmen ba ki skul kiba la i donkam ban pynbha kin sa ïoh khnang ba kan long ka lad jingïarap na ka bynta ki khynnah skul ban ïada na u slap bad ka lyer.
Haba kren pat shaphang ki lad jingïarap na ka bynta ki skul hapoh ka dong ka thaiñ, u bah Pius u la ong ba hooid na ka liang jong u ryngkat ka sorkar lyngba ka tnad pule puthi ki la leh ïa kaba bha tam hynrei don pat ki skul ki bym pat shym la ïoh ki lad jingïarap kiba dei ki skul shimet hynrei u la buh ka jingkyrpad ba kin long kiba ïai shah ba na ka liang jong u ruh un sa leh ïa ka kam ha kiwei pat ki por.
Namarkata, u bah Pius u la buh ruh ka jingkyrpad na ka bynta ki paidbah jong ka dong ka thaiñ ba ki ïai long ki briew kiba don ka jingïatreilang ha ki liang baroh kumno ban pyntyllun ïa ki kam ba bha hapoh ka konstiwensi khamtam eh ha kaba ïadei bad ka jingthmu ban kyntiew ïa ka jingnang jingstad namar ka long kaba donkam haduh katta katta.
U bah Kynsai Thongni, Junior Engineer ka tnad pule puthi ha South West Khasi Hills District haba kren bad pynshai halor ka jingpyntrei ïa ki projek na ka bynta ka jingpynbha ïa ki ïing skul ha kylleng ki jaka u la ong ba hadien ba ka sorkar ka la ïohi ba ka pule puthi ha ka jylla ka hiar bha dei na ka daw jong ka jingbym don ki ïing skul kiba paka. Kumta ban kyntiew ne pynbha ïa kata ka la buh thong da kaba ka la mang bun ka pisa ban pynlut ban pynbha ïa ki ïing skul da kaba phai ha ki phase.
“Ha kane ka jingmang, ka South West Khasi Hills District ka la long kawei na ki distrik kaba la ïoh bhah kyrpang namar ha ka Phase – I ka la ïoh haduh 10 tylli ki skul ban pynbha ha kaba la mang pisa mar T. 37 lak tyngka bad kawei ka dei ka Langring UP School kaba la ïoh jingmang pisa kaba T. 52 lak tyngka, ha ka Phase – II ruh ki la ïoh haduh 5 tylli ki jingtei ha ka jingpang pisa kaba mar T. 44 lak tam bad ha ka Phase – III ruh ki don ki don haduh 7 tylli ki jingtei kiba ka jingtrei ka dang ïaid shait shait ha ka dor jingmang pisa kaba mar T. 44 lak tam”, ïathuh u bah Kynsai Thongni.
Ha kane ka jingplie ïa ka jingtei ba thymmai jong ki ar tylli ki skul pule la donlang u bah D.G. Nongsiej, DSEO & In-charge SDSEO, South West Khasi Hills District, u bah G.G. Bung Snaitang, Deputy Chairman ka Meghalaya State Pollution Control Board (MSPCB), ki nonghikai, ki khynnah skul lem bad ki paidbah jong ki ar tylli ki shnong na Mawjai bad na Nongmluh.