Ban khanglad jingjia ba sngewsih, pynsangeh ki bor district EJHD ïa ka public hearing ha Daistong

Khliehriat Jymmang 22: Ki bor district jong ka East Jaiñtia Hills District hapoh ka jingpeit jingkhmih u Deputy Commissioner lem bad ki magistrate imat ki la ïohi ba ka jinglong jingman ha ka jingïalang public hearing ka long ka bym don jingshngaiñ bad kaba lah ban lam pynban sah kano kano ka jingjia ba sngewsih, kumta lyngba u Deputy Commissioner, u Manish Kumar, IAS la pynbna ïa ka jingpynsangeh noh ïa kane ka public hearing kaba la pynlong mynta ka sngi.
Ha kane ka public hearing, ym shym la don mano mano ruh ki ba ïoh ban kren halor rynsan namar ka jingkhih win ki paidbah kiba na baroh ar liang, kiba kyrshan bad kito kiba pyrshah public hearing.
Ha kaba sdang ka public hearing la ïoh tang ïa ka jingkren maitphang na u ADC ka East Jaiñtia Hills District, u Bah Alert Nongbri, MCS, la ïoh ka jingpynshai na ki heh jong ka tnat Meghalaya State Pollution Control Board ba kynthup u Member Secretary ka MSPCB, Bah G. Chyrmang bad na u Environmental Engineer MSPCB, Bah Y.F. Laloo.
Ha shwa ban sdang kane ka public hearing ka la don shwa ka jing ïa pynibor hapdeng ki pulit bad kito kiba pyrshah public hearing ba kynthup ki dkhot ka Jaiñtia National Council ba la ïalam da u President u Bah Sambormi Lyngdoh bad u Secretary u Bah Wanshwa Suting, Ka Jaiñtia Students Union ba la ïalam da u General Secretary, u Bah Niel Mukhim, ka Khasi Students Union East Jaiñtia Hills District ba la ïalam da u General Secretary u Bah K.S. Suchiang, ki paidbah kiba napoh Elaka Sutnga, ki paidbah nongrep kiba napoh elaka Nongkhlieh kiba pyrshah ïa kane ka public hearing ki la iathuh ruh ba ka la don ka jingshah khang lynti ïa ki, ha kaba kito ki briew kiba kyrshan ïa kane ka public hearing ki la khanglad ïa kiba pyrshah ban rung shapoh ka jaka pynlong public hearing, hadien shipor da ka jingia pyni bor kaba tyngeh ki la ïoh ban rung.
Haba kren sha ki pathai khubor, u nongïalam ka Jaiñtia National Council, u Sambormi Lyngdoh u la ong “Nga ai khublei ïa ka Hima Sutnga Youth Federation kumjuh ruh ïa ka elaka Sutnga baroh kawei kaba la ïatrei ryngkat lang bad ngi ki sengbhalang, la ai khublei ruh ïa kine ki paidbah nongrep kiba napoh elka Nongkhlieh ha kaba ngi la lah ban pynsangeh ïa kane ka public hearing mynta ka sngi, kane hi ka pyni shai ba lada ngi kum ki paidbah ngi ïatylli ka sorkar kam lah ban leh eiei ïa ngi, te nga phah ruh ka khubor kaba shai sha ka sorkar ba wat ju lehkai bad ka hok jong u paidbah bad ka hok jong u nongrep, kane ka jingpynsangeh ïa ka public hearing kaba ngim pat hun tang hangta hynrei ngin ïai buddien ba kito kiba la shah knieh ïa ka hok ki dei ban ïoh biang ïa la ka jong ka hok ka jong ki bad ka elaka Sutnga ruh ka dei ban ioh ïa u pud u sam kumba ki la pynsngew ba ka la don ka jingiatyngkhuh pud, nga ai khublei ruh ïa baroh ki dkhot jong ka ri bad ka jaitbynriew namar ba wat hapdeng ka jingshah byrngem, wat hapdeng ka jingshah khanglad jong ngi ki sengbhalang ha ki nongialam ka elaka Nongkhieh hynrei ngi la lah ban poi haduh kane ka jaka bad ngi la lah ruh ban pynsngeh ïa ka public hearing, hooid ngi la iaid lyngba shibun ki jingshah khanglad ha kaba la khanglynti da ki maw ba heh, ki dieng ba heh, ki lah sdang pyndonkam wat da ka bor, hynrei nga ai khublei ruh ïa ka tnat pulit namar ki pulit ki long beit hapdeng bad sngewthuh ba kim don liang shano shano ruh, ngi ai khublei ruh ïa ka tnat Meghalaya State Pollution Control Board, kumjuh ruh ïa ka ophis u Deputy Commissioner”
U Sambormi Lyngdoh u phah ruh u kyrwoh khubor sha u symbud myntri rangbah ka jylla, u bah Prestone Tyngsong uba bat ruh kum u myntri kam poh iing, halor ka jingailad ïa kiba pyrshah ban ïa don bynta ha ka public hearing, u kyntu ruh ïa ka sorkar ba kan peit ïa kane ka mat ba iadei bad ki nongshong shnong kumjuh ruh bad ka elaka namar khangba kino kino ki company kiba wan ban seng kam bad kiba kwah wanrah ïa ka roi ka par ka dei ban long da ka jingïahunlang ym da ka jingleh bor ïa ka hok jong u paidbah.
Na ka liang u General Secretary jong ka Khasi Students Union East Jaiñtia Hills District, u bah K.S.Suchiang u la ong ” Na ka liang ka KSU East Jaiñtia Hills Unit ngi pynpaw ka jingsngewkmen namar ka sur jong u paidbah ka la jop ha kaba kane ka jingthmu ban pynlong ïa ka public hearing hangne ha Lum Shyrman mynta ka la pulom namar ka jingpyrshah jur ki paidbah nongshong shnong, ka jingpyrshah ka elaka Sutnga, ki paidbah ka elaka Nongkhlieh, Shnongrim lem bad ka JNC, ka JSU bad kiwei kwei ki paralok sengbhalang, mynta la sakhi ba da ka jingïatreilang ba la pyrshah bad ka jingpyrshah jong ngi ka long kaba jop bad u Deputy Commissioner ruh u la pynbna ba la pynsangeh shwa ïa kane ka jingpynlong public hearing bad nga ong hangne ba ha ka ri synshar paidbah ka sur u paidbah ka long kaba khlaiñ, nga ïaroh ïa ka Hima Elaka Sutnga bad nga sngewthuh ba shisien ba la khih ka hima Sutnga ka jaitbynriew baroh kawei ka khih.”
U General Secretary jong ka Jaiñtia Students Union Central Body, u samla Niel Mukhim u la ong “Ka jingiatylli ka long ka bor, nga phah ruh ïa u kyrwoh sha ka sorkar ba barabor hi ka sorkar kam dei ban shim kabu ïa kiba duk ba rangli, namar haba nga phai sha kine ki pynthor kba, ki hali, ki lum ki wah katno ki long kiba itynnad bad kat kane ka jingitynnad ka sorkar ka la dei ban shim da ka lad lynti ban kyntiew ïa kankam jngohkai pyrthei, hynrei lada ka karkhana dewbilat ka don hapdeng kine ki lum, ki wah ba itynnad kan long kaei kaei kaba sngewsih bad sangsot ïa ka mariang bad sangsot ïa ki duk, ki suk kiba ju im ja kpoh da kaba rep ha une u Lum Shyrman”
Kum ban shu pynkynmaw, kane ka public hearing ka dei halor ka jingthmu ka company Shree Cement Ltd ban tih mawshun na kawei ka jaka kaba heh 217.394 Hectar kaba khot ka Lum Syrman Limestone Block-A kaba long katkum ka ka public notice jong ka Memo: No MPCB/TB-360/2026/SCL (Block-A)/EJHD/2026-27/4-A, dated: 17 tarik u Ïaiong 2026 ha kaba ka company ka thmu ruh ban buh ïa ka Primary Lumshyrman Limestome Crusher bad Secondary Crusher.