Buh maw nongrim u Myntri Rangbah na ka bynta ki kam pynroi ba 150 klur tyngka ha sor Tura

Shillong, Jymmang 22 : U Myntri Rangbah ka Jylla u Conrad K Sangma ha ka sngi Thohdieng, ula buh ïa u maw nongrim jong ki kam pynroi sor ba kot palat 150 klur tyngka ha sor Tura. Haba ai jingkren u la ban jur ba ka synshar khadar jongka sorkar MDA ka dei ban long kaba buh hakhmat eh ïa u paidbah .
Kine ki kam pynroi ki kynthup ïa ka jingpyntrei pynthymmai ïa ka Iew Najing ba 60.76 klur tyngka ba don bad ka jaka pynïeng kali, ka hotel, ka jaka shong dukan madan bad ka jaka bam ba ngiam 500 ngut, ka jaka pynïeng kali ba bun kyrdan ba T51.21 klur tyngka bad ka cinema complex ha Dakopgre lem bad ka jaka ban pynïeng 200 tylli ki kali, ka cinema ba don lai tylli ki screen, ka jaka ïalehkai bad jaka bam, ka jingpynbha ïa ka ïing ophis SMELC ka ban don ïa ka lynti ïaid kjat ba don da ki dur dro kti bad deiriti, ka museum, ka park ki khynnah, ka CM Youth Centre bad ka jaka ki riew tynmen.
Haba ai jingkren, u Myntri Rangbah u Conrad K Sangma ula ong ba ka synshar khadar ka dei ban ïai long beit kaba buh hakhmat ïa u paidbah bad kaba pynshong nongrim na ki jingïakren ba khlem sangeh bad ki nongshong shnong.
“Ka CM Connect ka dei ka buit ba la wanrah halor kane ka jingthmu- ba man ki nongshong shnong ki dei ban ïoh ka lad ban ïakren beit beit bad ka Sorkar” ong u Myntri Rangbah ha ka jingïalang kaba la wan ïashim bynta da u CEM ka GHADC, ki MDC, u Chairman ka Tura Municipal Board, ki Heh Ophisar, ki barikor bad ki nongshong shnong.
Haba batai ïa ka CM Connect 1971 helpline, ula ong “Man ki jingsngewkhia ba la pynsngew da ki nongshong shnong la buh jingthoh ha ka kor ki bor bad la phah pat sha ki Ophisar ba dei khmih ba kin leh eiei. ïa kine ki jingeh la khmih lynti ba kin pyndep hapoh ka por kaba la buh bad ïa kine ki kam baroh la khmih hi da ma nga hapoh ka por kaba biang”.
U Conrad ula pynbna ba ka Sorkar kan sa buh ïa ki CM Connect Office ha baroh ki 56 tylli ki Block ban pynduna ïa ka jing leit jingwan sha ki district headquarter. “Ki paidbah kim donkam ban hap leit shaduh ki district headquarter na ka bynta ki kam kiba donkam” ula ong.
Halor ka jingpynkylla dur ïa ka Tura, ula pynpaw “‘Ha kine ki phra snem, ka Sorkar ka la wanrah ïa ki skhim bapher bapher ban pynitynnad ïa ka sor Tura. Ngi dang don ha ka lynti kaba jngai ban ïaid hynrei lyngba da ki jingpyrshang ba ïaineh, ka Sorkar kan ïai bteng ban pynbha ïa ki jingdon jingem bad bei pisa ruh ha ki jingtei.
Haba batai bniah halor ka project Najing Bazaar, ula ong ba kane kan kynthup ïa ka jaka pynïeng kali ba ngiam 40 tylli ki trok bad 50 tylli ki kali, ka hotel ba 70 jingthiah bad 200 tylli ki dukan ba marjan.
U Myntri Rangbah ula pynlait ruh ïa ka Tura Municipal Board Mobile App, sam ïa ki cheque sha ki barikor hapoh ka Chief Ministers Artist Engagement Scheme, bad pynbna ban pyndait ïa 552 tylli ki LED streetlight bad 500 tylli ki CCTV camera ha kylleng ka sor Tura.
“Ngi la pynlait ïa ka skhim kaba aikam beit beit ïa ki barikor trai jylla-ban pynkylla ïa ki jaka paidbah kiba itynnad lyngba ki murals, ka jingthoh dur bad ki jingdro ba bun jait” ula ong haba bynrap “Kane kan plie ïa ka lad kamai kajih, pynsngew sarong ïa la ka jong ka sor bad ka jingïohi ïa ka jingitynnad ki jaka sor”.
Halor ka jingkhuid, ula ong ba ka rukom aikyrdan ïa ki shnong ki thaw kan “pynlong dustur ban leh khuid hapdeng ki nongshong shnong ha kaba la ai lad ka jingpynkhuid ba shisien shisnem” ong u CM
Haba pynïasnoh ïa kine ki kam pynroi sha ka 39th National Games 2027, ula ong “Ki jingtei kiba bha, ki lynti ïaid kiba khuid, ki jingpynwandur kaba la pynlong da ka jingithuh ïa ka kolshor kan batai ïa ka jingshem jong ki nongwankai ha ka por ba don kane ka lympung bad kumjuh ruh hadien habud”.
“Khatduh, ka jingjop jong ka jingpynkylla dur ïa ka sor yn sathew daka jingshem ha ka rukom im, pynthikna ïa ka jingshngaiñ ïa ki longïing longsem, ka burom naka bynta ki nongshong dukan madan, ka kabu na ka bynta ki samla bad ka jingkitkhlieh lang ha ka ban pynneh ïa ka jingkhuid bad ka sor kaba treikam” ong u Myntri Rangbah.
ïa kane ka prokram la pynkut da ka jingïalang jong ka CM Connect ha kaba ki nongshong shnong ki la pynsngew ïa ki jingeh beit beit hakhmat u Myntri Rangbah bad ki Ophisar.