Nongstoiñ, K’lyngkot, 17: Ki dkhot jong ka HNYM West Khasi Hills District, ha ka sngi Balang ki la lap ba ym don satia wat tang uwei ruh u nongtrei ha ka ophis PWD Nongstoiñ, wat haduh ka por kaba la palat na ka por longtrei kaba manla ka sngi ïa kaba la buh ryntih da ka Sorkar.
Ïa kane ka jinglong jingman kaba khlemakor jong ki nongtrei ophis hapoh katei ka tnad sorkar, la lap ha ka por kumba 11:30 baje eiei mynstep katba ki dkhot jong ka Seng ki la poi ha ka ophis na ka bynta ki jingdonkam, haba ïadei bad ka jingkieng kaba la sah slem ha ka shnong Tiehsaw.
Tang shu lap ba ka ophis baroh kawei ka thylli, ka seng ka la pyntip ruh ha u nongthoh khubor bad haba u nongthoh khubor u la poi hapoh ophis la ïohi shisha ba ym don briew satia ha katei ka ophis lait noh tang uwei u Barababu.
Haba ïadei bad kane, ka seng hapoh ka jingïalam jong u Bah Tailan Star Lyngkhoi President HNYM WKHD, u la ong ba ka seng kan leit ai da ka jingthoh ban ai jingujor sha u Deputy Commissioner jong ka West Khasi Hills District.
