Shillong, Kyllalyngkot, 17: Ka ophis u Superintendent of Police ka East Khasi Hills ha ka sngi Baar ka la pyntip ba u Myntri ka tnat Kam Pohing ka ri u Amit Shah un wan sha Shillong ha ka 18 tarik bad 19 tarik mynta u bnai.
Namarkata, namar ka jingïaid lynti jong ki VVIP, kan don ka jingthud khyndiat ha kaba ïadei bad ka jingpynsangeh ïaid ïa ki kali paidbah ha kiba bun ki bynta jong ka nongbah bad ha ka surok ban ïaid da ki VVIP (yn shah tang shi liang ban ïaid ïa ki kali ha ka por ba dang ïaid ki kali ba kit ïa ki VVIP).
La kyrpad ïa ki kali ba kim dei ban ïaknieh ïaid shakhmat bad ban ïaid beit da u laiñ. Yn shah ban ïaid tang ïa ki kali Emergency Service, la ong u SP.
