Shu shong thapngap ki Contractor Nongstoiñ bym don kam don jam: B.Marngar

Nongstoiñ, K’lyngkot, 17: U Bah B.Marngar uwei na ki kontraktor ba paw bha ha ki thaiñ Nongstoiñ u la ong ba ha ki snem kiba mynshuwa, ka kam kontraktor ka dei ka kam kaba myntoi bha ïa uwei pa uwei u briew u ba la register kontrak ha ki ophis sorkar kum ha PWD, PHE, Water resources bad kiwei kiwei ki tnad trei kam jong ka sorkar.
U la ong ba ha ki por ba mynshuwa haba ka sorkar ka khot tender ban shna ïa ki ophis, ki jaka sah jong ki nongtrei bad kiwei kiwei, ki kontraktor ki ïoh jingtrei ha la ki jong ki jong ki bynta kum ka nuksa haba shna ïa ki ophis sorkar ban tih ïa ka nongrim jong ka ophis u kontrak u dei da uwei, u ba shna ïa ka ophis da uwei.
Ha PHE u kontrak u ba ïoh ban trei ïa ki top um da uwei, ïa ki pipe heh da uwei, ïa ki pipe rit da uwei nangta ïa ki surok lada ka surok ka jrong san kilomitar da ki spah ngut ki kontraktor ki ïoh jingtrei, uwei ar phew mitar, uwei lai phew mitar, uwei san phew mitar bad kumta ter ter.
Hynrei u la ong ruh ba naduh u snem 2016-17, ki kontraktor ha West Khasi Hills ki la nang ring swai bad ring sdot katba nang mih ki sngi, khamtam kito ki class III, class II kontraktor bad wat ki class I kontraktor ruh kiba dang im ja na katei ka kam ki dei satang katto katne ngut.
Halor katei ka phang u bah Marngar u la ong ba ha kine ki snem ïa ki surok lada ki jngai katno katno ruh la pyntrei tang da uwei u briew lane da ki Kompeni. Nalor kata u la ong ba na ka bynta ban pynbha bad siang rong ïa baroh ki surok kiba rim ruh, la shimti da ka sorkar pdeng ban pyntrei da ka Pradhan Matri Gramsadak Yojana. U kontraktor u ba pyntrei u dei tang uwei hynrei ki kontraktor barit baria pat ki hap ban shu shong thapngap bad ki shu peit kai.
U bah Marngar u la ong ruh ba kine ki sngi ki la dei shisha ki sngi kiba eh bad kiba jynjar bha, namar lada leit pule ruh ynda la pyndep ki samla ki shu shongkai khlem kam khlem jam lada ym leit pule ruh ym sngew dei.
Nalor kata ka kamai kajih, ka ïew ka hat ka la hiar shaba palat bad haba peit thuh ïa ka jinglong jingman ha ka synshar khaddar, ka imlang sahlang bad ka khaïi ka pateng, kiba heh ki la nang heh, kiba rit, ki la nang rit, kiba riew spah ki la nang riew spah, kiba duk ki la nang duk bad duk ksew haduh ba wat tang u khaw ban shet ha ïing ruh ki la shitom ban ïoh.
U la ong ruh ba u ju ïohsngew ba ki don ki briew kiba ong ba naduh ba ka NPP ka la bat ïa ka sorkar ha ka jylla, ka ïoh ka kot bad ka kamai kajih ka la kiew bha. Hynrei ha ka jingpeit pyrman jong u kum u nongtreikam la jong (business man) kam shym la long satia kumta.
U la ong ruh ba lada phai ha ka jingïalam jong ka sorkar MDA I ka long kaba shisha, namar ba ki briew jong ki high level ki dang ïoh ban kit dewïong beaiñ man la ka sngi katba ki mon. Hynrei, ha kane ka sien kaba ar ba ka MDA II ka synshar ha ka jylla, imat ki high level ruh ki la la long nongpeit kai lang khamtam ha West Khasi Hills bym don MLA NPP shuh wat tang uwei ruh.