Lano kan urlong ka jingangnud jong ki paidbah ha kaba ïadei bad u surok NH-6 ha EJHD

Ngi la iohi ba bun kiba la ïa mih shakhmat naduh ki sengbhalang, ki paidbah, ki nongmihkhmat, ki riew paw khmat, kiba la pynsngew ïa ki jingeh jong ki paidbah ha ka leit ka wan, haduh ba ki hap ruh ban da pyni da ki kam kum ki jingïakhih, ki jingdawa, hynrei imat ka khlem trei kam, ki la dawa ban shna bha noh ia ka surok, hato kane ka jingdawa bad ka jingangnud jong ki paidbah lano kan urlong??, kumba long mynta ka surok national highway ha East Jaiñtia Hills District ka la sniew shaba palat khamtam ha ka thaiñ Narpuh, ki paidbah, ki sengbhalang ki la khmih lynti bad angnud ban ioh ïa ka surok kaba bha ban suk ha ka leit ka wan.
Lada ngi peit ïa ki data jong ka jylla Meghalaya jong ngi, ka district East Jaiñtia Hills District ka dei kawei ba hakhmat eh kaba pynmih pisa ne Revenue ïa ka jylla, na ka daw ka jingdon bun ki mar poh khyndew kum u dewïong, u maw shun, ki mar rep, tangba lada peit pat ïa ka rukom long jong ka district pat wat la mynta ka la tam ïa ka 10 snem ka jingioh district ruh, hynrei ka district ka dang duna bad shah iehbeiñ ha ka sorkar ha baroh ki liang, khamtam ha ka ba iadei bad ka surok bah NH-6.
Nga sngew ban buh ki jingkylli ba Balei ka sorkar kam kheiñkor lem mo ïa ngi? Balei ki nongmihkhmat jong ngi ki tlot ne balei? Balei ka NHAI ka ioh ban leh katba mon?
Ïa kitei ki jingkylli ka sorkar lane ki ba don ha bor ki dei ban da jubab ïa ngi ki paidbah khnang ban dup shai, namar phi long ki nongïasaid bad nongïada jong ngi. Haba peit ïa ki khubor ngi iohi ba ka NHAI ka lah ban iehnoh ban peit bad sumar ïa kane ka surok, mynta ka jingkylli nga buh hangne ba, Balei ban da poi shaduh u ta u pud? Ka NHAI ka dei hi ruh ban shim ïa ka jingkitkhlieh lada ka shim ïa kano kano ka rai la kan nang bteng ne em bad ka dei ban da jingpynshai.
Haba peit bha ïa ka rukom long jong kane ka sorkar Meghalaya, ngi don 2 ngut ki MLA kiba na East Jaiñtia Hills District kiba don mynta ha ka liang synshar bad u wei u ioh ruh ban long kum u myntri ka sorkar jylla lane u cabinet minister, hato kine ki MLA jong ngi kim don bor seh ban pyni ïa kata ka bor MLA bad ka bor minister jong ki?
Kat nang mih ki sngi katta ka nang jur ka jingsniew jong ka surok, la i tieng bad i ma ruh haba peit ïa ki kali kiba ïaid, la i kumba kin kylla ha pdeng surok , kane ka buh jingma bad jingsyier ym tang ïa kito kiba ñiah kali, hynrei ïa ki paidbah kiba ïaid lynti bad ïa kito kiba shong dukan haruh surok ruh ka buh jingma, kaba pyn sngewsih eh ïa ngi ka long ba ha ka por ba rang ba shit ngi ioh mad tang u khyndew pum pum ba buh jingma ïa ka koit ka khiah bad haba slap pat ngi mad tang ka ktieh, ka jyrsieh bad la i sangsot ïa ki khynnah skul kiba ïaid lynti na rud surok.
Lada ngam bakla ka jingiakren bad ka jingiatainia na ka bynta kane u surok ruh imat kam don ne duna bha hapoh ka ïing dorbar thaw aiñ, te lada ka dei kumta, ka mut ba ki nongmihkhmat jong ngi kim bna bad kim pyrwa eiei hi ïa ngi ki paidbah kiba mad jingeh ha ka leit ka wan.
Nga ngeit ba bun na ki paidbah jong ka district ngi la don ka jingkhmih lynti ba kan don ka jingpynbha pynmiat ïa kane ka surok ha kane ka aiom tlang ka ban wan, ka jingkylli ïa ki nongmihkhmat jong ngi ka long ‘Hato kan don ne em ka jingmaramot bha ïa kane ka surok?
Ne phi kwah ba kan shu long beit kumne? Hato kita ki ba dei ban peit kin leh katba ki mon bad ma phi ruh phin leh katba phi mon? hynrei kawei ba ka sorkar bad phi kum ki nongmihkhmat phi dei ban tip ba ki paidbah ka district ki angnud ban ioh ïa ka surok kaba bha bad ngi khmih lynti ruh ba ka jingmaramot ïa ka surok ka dei ban long kaba bniah, kaba neh slem bad ka ban nym wanrah jingeh ïa ki paidbah ha ka leit ka wan.