Nongstoiñ, Naiwieng 19: Katkum ka jingmang (norms) jong ka sorkar India, la mang kawei ka District Hospital (Civil), nangta ki CHC, PHC bad Health Sub centre ha ka Jylla Meghalaya, kata katkum ki jingdon ki nongshong shnong. Hynrei imat hapoh jong kane ka jylla, ym don ba kynmaw ban wad bniah ïa kiba kum kine ki kam, khamtam ba ka dei ka kam kaba ïa dei bad ki nongshong shnong kiba rit baria, ba duk ba rangli.
Ym lah ban shu sngap shilynter ha kum ki jingeh kiba bym lah ban kiar, ba ka sorkar kam ju patiaw ne buddien ban bit ban biang ïa ki paidbah. La hap ban kynnoh kumta, namar katkum ka jingkheiñ ban biang ki jaka ai dawai ne sumar pang ym pat lah ban buh katkum ka survey kumba kwah ka sorkar kmie.
Katkum ka jingshisha, ki Sub-Health Centre ha ka Jylla ki donkam 789 hynrei dang buh tang 397. Ki PHC ruh donkam 118 dang buh tang 109. Lait noh tang ki CHC kiba don 29 na ka 29.
Shuh shuh, kiba bun ki riew paidbah, ki tip ba katkum ka jingbthah ka sorkar kmie, kawei ka Sub Centre sha kawei pat ka dei ban jngai tang 5 kilometer, ki PHC na kawei sha kawei pat ki jngai 15 kilometer bad CHC 30 kilometer kawei na kawei pat. Katba ha ka Jylla Meghalaya khamtam ha ki District, ka jingjngai ka la long da ki phew kilometer.
Ha West Khasi Hills District bad ka Nongstoiñ kaba dei ka District Head Quarter, ka long kaei kaei kaba la isynei bad pang mynsiem haba peit ïa ka jingïa ieng laiñ bad ka bah khun da ki nongshim dawai hapoh Civil Hospital Nongstoiñ, kaba la ju jia man ka por. Ka jingisynei eh ka long ba u laiñ u ba sdang naduh u nongai slip ha Counter bad poi shaduh shabar.
La ju tip bha barabor ba ka jingleit shim dawai na Civil Hospital ka long tang ban lait ka bai eksamin u Doctor, haba leit sha ki private clinic. Hynrei kam shym la tikna ha ka jingmut jong ki paidbah ba kin ïoh dawai ei na ka Hospital ka sorkar, namar wat ïa u thyrnia injek, bandage barit ruh la ju thoh lang ha ka slip dawai ban hap ban da thied hi.
Haba kylli na ki ba balei ka jia haduh katne la ki dang ïoh ïakynduh Doctor ne em, ka jubab ka long ba ka ju long kumne hi shilynter, khamtam ha ki sngi iew rit iew heh, ki paidbah kin hap ban ap katba dang lah ki Doctor. Haba kylli pat kumno ki Sub Health Centre ne ki PHC ha ki jaka jong ki, ki ong ka jngai than ka long kajuh hi ban wan haduh Nongstoiñ. Nalor nangta ruh khambun hi kim da treikam thikna bad jynjar ban ïoh dawai.
Haba ka long haduh kat tei ka jingbun briew bad pynjynjar sat ïa ki Nongkyndong kiba duk ha ka pang ka shitom, la ithuh shai ba katei ka Hospital kam don shuh ka jingkot bor ban shakri haba ïa nujor bad ka jingbun paid ha West Khasi Hills.
Kumta ka Sorkar Jylla ka la dei ban kylla thiah halor kane ka bynta bad ka dei ban thaw ki lad kumno ban pynbiang pisa kum ha kane ka bynta jong ka pang ka shitom kiba duk kiba kut lad. Kan long ruh ka kam beaiñ lada dang ïalehkai ïa ka ïap ka im ki briew la jong, haba wat ka sorkar kmie ka pynleit jingmut eh kham bun na ka pisa ka ri, ka dei ha ka koit ka khiah.
