Suk kaba shah rem ha ka elekshon ban ïa kaba thok ïa ki paidbah: Bah Pius Marweiñ

Pdiang burom ka UDP ïa ki nongkyrshan ba wan rung thymmai na ka NPP

0

Mawkyrwat, ‘Naiwieng, 19: Ka United Democratic Party (UDP) jong ka Ranikor Circle ha ka 19 tarik u ‘Naiwieng, 2022 ha ka jingïalang ba la long ha shnong Wahkaji, South West Khasi Hills District ka la ïoh ban pdiang burom ïa ki nongkyrshan ba dang wan rung thymmai sha ka party ha ryngkat ka jingsakhi lang jong ki nongkyrshan naduh ki ‘riew rangbah, ki longkmie bad kumjuh ruh ki khun samla jong ka dong ka thaiñ.
Ha kane ka sngi, ïa ki nongkyrshan ba thymmai ki dei na ka National People’s Party (NPP) kiba la rung ban ai jingkyrshan ïa ka UDP jong ka Ranikor Constituency la pdiang sngewbha da u bah Pius Marweiñ, MLA/MDC Ranikor Constituency ha ryngkat ka jingpyndeng ruh da ka lama jong ka party.
U bah Pius Marweiñ, MLA/MDC ka Ranikor Constituency, haba kren pdiang burom ïa ki briew kiba dang wan rung thymmai ban ai ka jingkyrshan ïa party UDP u la ong ba ka jingwan jong ki kan long ka jingshngaiñ bad ka jingkyrmen na ka bynta ka jingpynkhreh ïa kane ka MLA Elekshon 2023. “Ka jingwan rung jong ki sha ka UDP kam dei ba ka jingjop ka la ap lypa hynrei ka donkam pat ïa ka jingtrei shitom bad ka jingïatreilang jong ki nongkyrshan kiba rim bad kiba thymmai khnang ba kam kan long kaba ïaid beit ïaid ryntih”, ong u bah Pius bad ka jingkhang ka plie rynghang na ka bynta baroh kito kiba kwah ban rung bad ai ka jingïatreilang bad ka UDP bad ban don ki jingthmu ban wanrah ïa ka roi ka par bad kiwei de ki kam kiba bha ha ka dong ka thaiñ.
Ha kajuh ka por u la ong, “Suk kaba shah rem ha ka elekshon ban ïa kaba thok ïa ki paidbah da kiba bun ki rukom ne ki jingpynthame namar da kaba thok bad shukor ïa ki paidbah ha kawei pat ka sngi kin nym ai shuh ka jingkyrshan la ha kano kano ka jingïaleh”. Hynrei kum u nongmihkhmat jong ka Ranikor Constituency tang ha i por iba lyngkot hadien ba u la jop u la lah ban leh ïa shibun kiei kiei ki kam kiba long ka jingmyntoi na ka bynta ki paidbah la ka long ha ka jingïarap ïa ki skul pule, ka jingïarap na ka bynta ki longïing kiba duk, khamtam eh ban ïarap ïa kiba donkam ha ka liang ka koit ka khiah da kaba u la buh ïa ki kali kit nongpang ha ki jaka sumar kiba don hapoh jong ka Ranikor Constituency.
Namarkata, u la buh ka jingkyrpad ïa ki paidbah nongkyrshan ba nangne shakhmat kin long kiba ïatreilang bad kiba ai ruh ki jingmut ïa ki nongïalam khnang ba yn ban pyntyllun ïa ki kam kiba bun kham shakhmat bad ruh ban ïoh ban pyndep ruh ban sam ïa ki lad jingïarap sha kiba dei hok ban ïoh khlem kano kano ka jingbuhrieh namar kumba la pdiang ïa ki nongkyrshan kiba thymmai kumta ruh kan long na ka bynta ki bhah jong ki paidbah.
U bah Kynsaibor Syiemiong uba la bat mynshwa kum u Assistant Secretary jong ka NPP Phlangdiloiñ Primary Unit uba la rung kum u nongkyrshan jong ka party UDP u la ong, “ka jingmih jong nga na ka NPP kam dei na kano kano ka daw bad ka jingrung jong nga sha ka UDP ruh kam dei ba nga don ka jingïajan badno badno hynrei ka dei ba ka jingïohi ba um don jingmut shuh ban kyrshan ïa u MLA uba la shongthiat noh namar ym don jingkyrmen shuh”.
Kiwei pat ki nongkren ki long u bah P.F.L. Langrin bad u bah C. Nongbri, Working President jong ka UDP Ranikor Circle.

Leave A Reply

Your email address will not be published.