Nongstoiñ, Naiwieng,19: Ka Federation of Khasi Jaiñtia and Garo People (FKJGP) Rimuliang Circle, ka pynpaw ka jingsngew kmen haba ïoh jingtip ba na ka liang ka Sorkar Meghalaya, kan plie sa ïa ka Rimuliang Block. Kane ka dei ka mat kaba kum ka seng ka ai jingïaroh bad pyrto da shisha ïa kane ka Sorkar kaba mynta, kaba la ïohi jngai ban wanrah sa ïa ka Rimuliang block.
“Kum ka seng haba ngi ïoh pdiang ïa ka block, ngi dei hok ban pdiang ïa ka da kaba kmen. Ka jingkyntu ïa ki nongïalam shnong ki seng samla shnong ki para sengbhalang ka long, ba ngin ïa tylli lang kawei ban ym don kano kano ka jingwit ne ka huri hura, khamtam ba na ka liang ka Sorkar kan sa buh ïa u mawnongrim jong ka C&RD Block ha ka 22 tarik”, ong u Bah Serbilin Lyngdoh General Secretary.
“Halor ka jaka ban sa tei ïa ka permanent office Building jong ka Block, na ka liang ka seng ngim don kano kano ka jing ujor, namar ïa kane ka kam kan shong eh ha ka Sorkar bad ki bor synshar Shnong bor bad ki bor synshar Hima ha ka thaiñ, hynrei tangba kan dei ka Block hapoh ka thaiñ Rimuliang”.
“Ka jingai Block ha ka thaiñ kam dei ka jingïoh nong ne jingmyntoi jong kano kano ka kynhun ne ka seng saiñ pyrthei jong no jong no, hynrei kan dei ka jingmyntoi ïa u duk u suk ki paidbah ha ka dong ka thaiñ hi baroh kawei”, u la ong.
