Lamkhmat u DC Ri-Bhoi ban ai dawai polio ïala i khun, haka National Immunisation Day- Pulse Polio

Nongpoh, Jylliew 29: Haka jingsdang ïaka National Immunisation Day- Pulse Polio ha Ri-Bhoi District, u Dr Abhishek Saini Deputy Commissioner ka Ri-Bhoi District mynta ka sngi u la lamkhmat ban ai dawai Polio ïala i jong i khun kum ka jingpynshlur ruh ïa kiba bun ki kmie ki kpa kiba dang don khunrit ba kin shim ïa kane ka kabu naka bynta ka jingïada ïala ki khun ban lait naka jingpang Polio.
Ha kane ka jingïalang ban sdang ïaka jingai dawai polio la pynlong ha Nongpor Urban Health and Wellness Centre haka shnong Umlyngkdait ha kaba u DC ka Ri-Bhoi, u Dr Abhishek Saini u la shim bynta kum u kongsan haka jingdonlang ka Dr. AR Marak DMHO, ka Dr. Alisha J Syiemlieh, District Surveillance Officer bad kiwei kiwei.
Haba kren ha kane ka sngi naka liang u Dr. Abhishek Saini u la ai khublei ïaka tnad ka koit ka khiah kaba la shimkhia ban pynlong ïa katei ka prokram kaba donkam bad u la kyrpad sha baroh ki kmie ki kpa ba kin rah ïala ki jong ki khun kiba hapoh 5 snem sha ki jaka ai dawai polio, bad ban pynjaw tang 2 drop naka bynta ka jingim kaba bha ban lait na katei ka jait jingpang.
Kane ka jingai dawai Polio ka long kum shi bynta jong ka thong jong ka sorkar ban pynthikna ba baroh ki khyllung kiba hapoh 5 snem ka rta kin ïoh ïa ka jingïada na ka jingpang polio.