Shillong, Jylliew 29: Ka Meghalaya Pradesh Mahila Congress, lyngba ka Kong Joplyn Scott Shylla, President Mahila Congrss Committee ka pynrem jur ïa ka jingshah bom shah tied bad jingshah leh beiñ jong kawei ka samla ha Nongstoiñ Bypass, West Khasi Hills, kumba la paw ha ka video kaba la saphriang paidbah. Kum kine ki jingleh donbor pyrshah ïa ki kynthei ki long kiba ym lah satia ban pdiang bad kum kine ki shynrang ym dei ban ailad ba kyn don lang ha ka imlang sahlang jong ngi.
Ka la ong, “Ngi ai jingïaroh ïa ka Meghalaya Police namar ka jinglah jong ka ban kem ïa uwei na kiba donkti bad ngi kyrpad ïa ki bor ba dei peit ba kin pynsted ban ithuh bad kem ïa baroh kiba donkti ha kane ka kam shoh beiñ ïa kane ka samla marwei hapdeng ki kynhun shynrang khnang ba kane ka samla kan ïoh ïa la ka hok.”
Shuh shuh na ka liang jong ka ka la ong, “Ngi ïeng ryngkat bad kane ka riew samla ba shah leh beiñ ha kine ki riew Khlaw bad ngi khot ïa baroh ki nongshong shnong ba kin ïeng pyrshah ïa ka jingthombor pyrshah ïa ki kynthei. Kawei pa kawei ka kynthei ka don ka hok ban kan im ha ka burom, ka jingshngaiñ bad khlem ka jingsheptieng ha ka jing ïaid lynti ha ka jingim jong ka.
