Nongstoiñ, Jylliew 29 : Ka tnad pulit jong ka West Khasi hills ha kane ka lah sngi u blei ka 29 tarik Jylliew ka la pynbna paitbah ba kino kino ki nongshong shnong lada ki lap ïa ki jingjia ba ki kynthei ki shah shoh shah dat kim dei ban pynsaphriang ïa ki dur khih lyngba ki rynsan pathai khubor bad social media.
Katei ka jingpynbna paitbah jong ka tnad pulit ka dei hadien ba ka la don ka jingpynsaphriang ha ki rynsan social media ïa kawei ka jingjia ha ka jan miet 28 tarik Jylliew ha surok bah National High way 44 (E) Nongstoiñ by pass ha kaba kawei ka samla kynthei ka la shah shoh bad shah tangon ha uwei u briew uba la suba ba u dei u lok ba rim jong ka.
Kat kum ka kyrwoh na ki pulit la ong ba halor ka jing shah shoh jongkatei ka samla la register da ka suomoto case katkum ka kyndon 43 (6) 2026 74/135/109 jong ka Bharatiya Nyaya Sanhita .
Ka tnad pulit ka maham ruh ba kino kino kiba pynsaphriang ïa kiba kum kitei ki dur khih kin shah pynshitom kat kum ka Bharatiya Nyaya Sanhita bad ka Information Techonology Act . Ha kajuh ka por ki pulit ki la pynkynmaw ba ka jingpynpaw kyrteng ïa ki lanot ka long kaba beaiñ. Nalor kata ka tnad pulit ka pyntip ruh ba lada don kino kino kiba tip halor katei ka jingjia ki la ban pyntip ha u number 9366498499 uba dei u number jong ka Police control room lane ha u number 112. Ka tnad pulit jongka West Khasi hills ka pynthikna ruh ba ïa kino kino kiba donkti ki pulit kin leh da kaba tyngeh bad pynshitom kat kum ka aiñ bad ka la kyrpad ruh ïa baroh ki nongshong shnong ba kin ïa treilang na kabynta ban wan rah ïa ka shong suk shong saiñ hapoh ka district.
