Ladep ban mang pisa 140 klur ïa ka surok Weiloi–Mawkyrwat–Rangthong kaba jngai 38.9 km: Renikton

Mawkyrwat, Nailar 12 : Hadien ka jingap khmih lynti kaba la slem jong ki paidbah ban ïoh ïa ka surok kaba bha na Mawkyrwat–Jakrem sha Weiloi, u Bah Renikton Lyngdoh Tongkhar, MLA ka Mawkyrwat Constituency, ha ka 11 tarik u Nailar 2026, u la ïathuh paidbah ba shen yn sa sdang pyntrei ïa kane ka surok Intermediate Lane kaba deina Weiloi – Mawkyrwat sha Rangthong.
U la ïathuh ruh ba ka Sorkar Meghalaya, ha ka 10 tarik u Nailar 2026, ka la mang pisa haduh T. 140/- klur na ka bynta ban pyntrei ïa ka surok kaba sdang na Weiloi, lyngba Mawkyrwat, bad pynkut ha Rangthong, kaba jngai kumba 38.9 km, hapoh ka Phase-I.
U Bah Renikton Lyngdoh Tongkhar u la pyntip shuh shuh ba kum shi bynta ban pynsdang ïa kane ka projek, u Myntri Rangbah ka Jylla, u Conrad K. Sangma, ryngkat bad u Symbud Myntri Rangbah ka Jylla, u Bah Prestone Tynsong, kin wan ban buh ïa u mawnongrim ha Mawkyrwat ha ka 17 tarik u Nailar, 2026.
Lyngba kane ka projek surok la khmih lynti ba kan long kawei na ki projek ba kongsan ban pynbha ha ka ïaid ka ïeng jong ki paidbah lyngba ki kali bad ban kyntiew ïa ka roi ka par ha ki shnong ki thaw bad ha ka dong ka thaiñ baroh kawei.